६४ जनामा कोरोना संक्रमित भेटिएको पर्सामा थप संक्रमण फैलिन नदिन निषेधाज्ञा जारी गरिएको छ । जिल्ला प्रशासनले कोरोना संक्रमण रोकथाम तथा नियन्त्रण र जिल्लामा शान्ति सुव्यवस्था कायम गर्न नेपाल प्रहरी र सशस्त्र प्रहरीका साथै सेनासमेत परिचालन गर्ने निर्णय गरेको हो ।

प्रमुख जिल्ला अधिकारी विष्णु कुमार कार्कीको अध्यक्षतामा जिल्ला सुरक्षा समितिको बैठकले बैठकले मंगलबार साँझ ८ बजेदेखि लागू हुनेगरी जेठ ५ गते मध्यरातिसम्मको लागि निषेधाज्ञा जारी गरेको छ । पर्सामा मंगलबारमात्रै ३९ जनामा कोरोना संक्रमण पुष्टि भएको छ ।

निषेधाज्ञाकाे बेला उपचारबाहेक अन्य अत्यावश्यक काममा बाहेक घरबाहिर निस्कन निषेध गरिएको छ । खानेपानी, दूध, विद्युत, दमकल, सञ्चार, भन्सार, आईसीपी, क्वारेन्टाइन, फोहोरमैला व्यवस्थापन, इन्धन, एम्बुलेन्स र औषधिजस्ता अति आवश्यक सेवा निषेधाज्ञामा पनि सञ्चालन गर्न पाइने छ । तर पसल, उद्योग, व्यवसाय भने खोल्न निषेध गरिएकाे छ ।

भारतसँगको सीमा नाका र खुला सिमानाको जुनसुकै स्थानबाट पनि मानिस आउन निषेध गरिएको छ । उनीहरुलाई रोक्न सुरक्षाकर्मीको व्यापक गस्ती बढाई ‘एरिया डोमिनेसन’ गर्ने निर्णय पनि प्रशासन कार्यालयले गरेको सहायक प्रमुख जिल्ला अधिकारी ललितकुमार बस्नेतले जानकारी दिए ।

पर्सा जिल्लाबाट अन्य जिल्लामा र अन्य जिल्लामा पर्सा जिल्लाबाट हुने आवतजावत जेठ ५ गते राति १२ बजेसम्म बन्द गरिएको छ ।

प्रकाशित समय २०:५४ बजे