दुई गाउँको किचलोले बिजुली नबल्दा हुम्ला सदरमुकाम सिमकोटको ठेहे गाउँका बासिन्दाले बिजुलीको तार काटेर गाई बाँध्ने दाम्लो बनाएका छन् । करिब दुई करोड खर्च गरेर एक दशकअघि बरगाउँ र ठेहेले संयुक्त रुपमा बनाएको टल्की बिजुली आयोजना गाउँलेहरूको किचलोकै कारण लथालिंग र अलपत्र परेको छ ।

आयोजनाका अध्यक्ष र कार्यसमितिका व्यक्तिले मर्मतसम्भारका नाममा पटक पटक आउने लाखौं रकम खाएर योजनालाई लथालिंग पारेको आयोजनाका पूर्वअध्यक्ष बरगाउँका पदम लामाले बताए । सकेसम्म पुनर्निर्माण र मर्मतको प्रयास गर्ने र नभए आजसम्म हिनामिना भएको करिब ६० लाखको लेखाजोखाका लागि अख्तियारमा निवेदन दिन बाध्य हुने उनले बताए ।

यो आयोजना हुम्लामै समुदायस्तरबाट निर्माण गरिएको सफल आयोजना मानिन्छ । एकातिर स्थानीयहरू आफूले श्रम गरेकाले निःशुल्क बिजुली बाल्न पाउनुपर्छ भन्ने र अर्कोतिर बर्सेनि मर्मतसम्भारका लागि आउने दशौं लाखको रकम चलाउन पाउने र नपाउनेको चपेटामा यो योजना परेको स्थानीय सञ्चारकर्मी सूर्यमणि बोहराको भनाइ छ ।

बिजुली बाल्दा केही समस्या आए आफैँ बन्द हुने अटो सिस्टम भएकाले जिल्लाकै सुरक्षित बिजुली मानिए पनि एक वर्षदेखि आयोजना बन्द छ । आयोजना बन्द भएपछि प्रसारणलाइन र घर‑घरमा लगिएका तार निकालेर स्थानीयले गाईवस्तु बाँध्न र अन्य घरेलु प्रयोजनमा प्रयोग गरेका छन् ।

टल्की आयोजनाबाट करिब तीन हजार घरधुरीले बिजुली बाल्दै आएका थिए । अहिले उनीहरू सल्लाको दियालो अर्थात् झरो बाल्न बाध्य छन् ।

प्रकाशित समय ११:४९ बजे