महिन्द्रा फोरह्विलरको नेपालका लागि एकमात्र आधिकारिक विक्रेता अग्नि समूहको सहायक कम्पनी बालाजु अटोवर्क्स प्रालिले बाराको जितपुर–सिमरा उपमहानगरपालिकामा महिन्द्रा फोरह्विलर सवारी साधनको सर्भिस सेन्टर स्थापना गरेको छ ।  कम्पनीका अनुसार सेवा केन्द्र ‘सिमरा अटो जोन’ त्यस क्षेत्रका लागि बालाजु अटोवर्क्सको अधिकृत सुसज्जित डिलर हो ।

सर्भिस सेन्टरको प्रदेश २ का भौतिक पूर्वाधार विकासमन्त्री जितेन्द्र सोनाल र बालाजु अटोवर्क्सका प्रबन्ध निर्देशक अर्जुनप्रसाद शर्माले मंगलबार संयुक्त रूपमा उद्घाटन गरेका छन् । कार्यक्रममा सिमरा अटो जोनका प्रबन्ध निर्देशक राजेशकुमार क्षेत्री र स्थानीय प्रतिनिधिहरूको उपस्थिति थियो ।

‘यो सेवा केन्द्र स्थापना गर्नुको उद्देश्य बारा र वरपरका क्षेत्रका ग्राहकलाई सुविधाजनक र किफायती सेवा दिई उहाँहरूलाई कम्पनी र यसका सबै गुणस्तरीय सेवामा पहुँच उपलब्ध गराउने उद्देश्य छ,’ कम्पनीद्वारा जारी विज्ञप्तिमा भनिएको छ ।

बालाजु अटोवर्क्सका प्रबन्ध निर्देशक शर्माले सबै महिन्द्रा सर्भिसिङ केन्द्रहरूमा ग्राहकलाई अधिकतम सन्तुष्टि दिनका लागि निरन्तर गुणस्तरीय सेवा प्रदान गर्न कम्पनी केन्द्रित रहँदै आएको बताए । यो सर्भिस सेन्टरले ग्राहकलाई महिन्द्रा अटोमोबाइल्सका स्कर्पियो, बोलेरो पिकअप, एक्सयूभी ५००, टीयूभी ३००, केयूभी १००, थारलगायतका सबै उत्पादन शृंखलाको बिक्री–सेवा र सक्कली स्पेयर पार्ट्स उपलब्ध गराउनेछ ।

सिमरा अटो जोन जितपुर‑सिमराका प्रबन्ध निर्देशक राजेशकुमार क्षेत्रीले कम्पनीको प्रमुख उद्देश्य महिन्द्राको सवारी साधनका लागि सर्भिसिङ र सक्कली स्पेयर पार्ट्स प्रदान गर्नु रहेको बताए । यो क्षेत्रमा सर्भिस सेन्टरको स्थापनाले आगामी दिनमा ग्राहक र कम्पनीबीचको विश्वासलाई अझ प्रगाढ बढाउन मद्दत पुग्ने विश्वास लिइएको जारी विज्ञप्तिमा उल्लेख छ ।

प्रकाशित समय १५:५९ बजे