कोरोना महामारीका कारण भारतबाट कैलालीको त्रिनगर नाका भएर नेपाल भित्रिने नागरिकसँग यातायत व्यवसायीले चार गुणाभन्दा बढी भाडा असुल्ने गरेका छन् । ‘कोरोनाको जोखिम बढी हुने’ भन्दै व्यवसायीले भाडा बढी लिने गरेको यात्रुले गुनासो गरेका छन् ।

भारतबाट आएका नागरिकसँग सीमा क्षेत्रमा दैनिक भाडाका लागि बार्गेनिङ हुने गरेको छ । सुदूरपश्चिमका पहाडी जिल्लासम्मको भाडा बढीमा एक हजार रुपैयाँ भए पनि व्यवसायीले साढे ३ हजारदेखि ५ हजारसम्म असुलेको यात्रुले बताएका छन् ।

भारतमा मजदुरी गर्दै आएका नेपाली कोरोना त्रासका कारण अहिले स्वदेश फर्किरहेका छन् । कैलालीमा निषेधाज्ञाको मौका छोप्दै सवारीधनीले सीमा क्षेत्रबाट पाँच गुणा बढी भाडा लिएको एक यात्रुले बताए । कैलालीको लम्कीचुहा नगरपालिका २ वलियका तुलबहादुर कोलीले भारतबाट सहज रुपमा सीमासम्म आइपुगे पनि नेपालको सीमा नाकमा धेरै दुःख पाइएको दुखेसो गरे । ‘पहिला २ सय रुपैयाँमा घर पुगिन्थ्यो,’ उनले भने, ‘अहिले १ हजारदेखि १२ सयसम्म भाडा तिराए ।’ सीमा नाकामा नेपालीहरु भाडाका नाममा लुटिइरहेका छन् । तर, स्थानीय तहदेखि प्रशासनसम्मलाई जानकारी गराए पनि बेवास्ता भएको कोलीले गुनासो गरे ।

यातायात व्यवसायीले त्रिनगर सीमा नाकाबाट आलोपालो यात्रुलाई गन्तव्यतर्फ लगिरहेका छन् । एक दिन सुन्दर पश्चिम यातायात व्यवसायी र अर्को दिन अन्य यातायातका सवारी सञ्चालन हुँदै आएका छन् । सरकारले सामान्य अवस्थाको भाडाको थप ५० प्रतिशत लिएर यात्रुलाई गन्तव्यमा लैजान सूचना सार्वजनिक गरेको छ । तर, व्यवसायीको मनोमानी र स्थानीय प्रशासन, स्थानीय तह र सरकारकै अकर्मण्यताका कारण यात्रुले पाँच गुणा बढी तिर्नुपरिरहेको छ । बाजुराका लोकबहादुर शाहीले विगतमा बाजुराको भाडा १ हजार भए पनि अहिले ५ हजार तिर्नुपरेको बताए । उनीहरूले भनेजति भाडा नदिए बसमा चढ्नै नदिने यात्रुहरूको गुनासो छ ।

जिल्ला प्रशासन कार्यालय कैलालीले यातायात व्यवसायीले बढी भाडा लिएको गुनासो प्रशासनमा आएको स्वीकार गरेको छ । ‘भाडा बढी लिएको विषयमा यातायात व्यवसायीसँग नियमित छलफल भइरहेको छ,’ कैलाली प्रशासनका सूचना अधिकारी शिवराज जोशीले भने, ‘सरकारले तोकेअनुसार यातायात व्यवसायीले भाडा लिए/नलिएको बारेमा यात्रुसँग जानकारी लिने काम भइरहेको छ, बढी लिएको भेटिए कारबाही गर्छौं ।’

सार्वजनिक यातायात सहज रुपमा सञ्चालन नभएसम्म सर्वसाधारणलाई यात्रा गर्न पनि मुस्किल हुने देखिएको छ । अहिले सीमितमात्रै सवारी सञ्चालन भएकाले यात्रा गर्दा न सामाजिक दूरी कायम भएको छ न त सीमा क्षेत्रमा यात्रु खोज्दा सतर्कता अपनाइएको छ । यसले सबैलाई जोखिम भए पनि सरोकारवालाले गम्भीर रुपमा लिएका छैनन् ।

प्रकाशित समय १०:११ बजे