गृहपृष्ठ दसैंमा ट्राफिक सक्रियता बढ्यो, सवारी जाँचमा कडाइ
दसैंमा ट्राफिक सक्रियता बढ्यो, सवारी जाँचमा कडाइ
फाइल तस्बिर
दसैंको समयमा ट्राफिक नियम उल्लंघन गरेका सवारीसाधनलाई कारबाही गर्न महानगरीय ट्राफिक प्रहरी महाशाखाले सवारी जाँचमा कडाइ गरेको छ । विगतको भन्दा २० ठाउँ धेरै स्थानमा जाँचस्थल स्थापना गरेको ट्राफिकले जाँचसमेत कडा बनाएको छ ।
चाडपर्वका बेला हुने यात्रुलाई हुने समस्या समाधानका लागि उपत्यकामै २० बढी स्थानमा जाँचस्थल स्थापना गरेको महाशाखाका प्रमुख वरिष्ठ प्रहरी उपरिक्षक बसन्त थापाले जानकारी दिए । ‘चाडपर्वको समयमा धेरै यात्रु राखेर ओहोरदोहोर गराउने र तीव्रगतिमा चलाउने प्रवृत्तिले दुर्घटना बढ्न सकछ,’ उनले भने, ‘त्यसको नियन्त्रणका लागि सवारी जाँच तथा कारबाहीका लागि मुख्य–मुख्य सडकखण्डमा ट्राफिक जाँचस्थल थपेका हौं ।’
विषेशगरी उपत्यकाबाट बाहिरिने नाकामा बढी जाँचस्थल राखिएको छ । कलंकी–नागढुंगा सडक, कोटेश्वर–भक्तपुर सडक तथा बालाजुबाट नुवाकोट जाने सडक र फर्पिङ सडकखण्डमामा बढी जाँचस्थल राखिएको छ । जाँच स्थलमा सवारी जाँच तथा ट्राफिक नियम पालन गराउने कार्यसम्बन्धी जानकारी प्रहरीले दिइरहेको छ । जाँचस्थलमा बसेका प्रहरीले सवारीसाधनमा क्षमताभन्दा बढी यात्रु नराख्न र नचढ्न आग्रह गरेका छन् ।
छतमा बस्न नदिने, तोकिएको शुल्कभन्दा बढी भाडा लिएमा फिर्ता गराउने, पशु चौपायालाई छत र डिकीमा राखेर ओहोरदोहोर गराउन रोक लगाएको छ । प्रहरीले यसअघि नै दसैंतिहारलाई लक्षित गर्दै विशेष सुरक्षा योजनासमेत लागू गरिसकेको छ । प्रहरीले यात्रुको सुविधाको लागि टिकट काउन्टरमा सहायता कक्षसमेत स्थापना गरिएको छ । काठमाडौंबाट बाहिरिने नाकामा मात्रै नभई उपत्यकाभित्रै पनि सवारी जाँचमा कडाइ गरिएको ट्राफिक प्रहरीले जनाएको छ ।
प्रकाशित समय १७:५० बजे

















