कञ्चनपुरकी १३ वर्षीया बालिका निर्मला पन्तको परिवार धर्नामा बसेको पाँच दिन बित्यो । छोरीको बलात्कारपछि हत्या गर्ने हत्याराई कारवाहीको माग गर्दै धर्नामा बसेका निर्मलाका आमाबुबाको पाँच दिनमा स्वास्थ्य अवस्था कमजोर भएको छ । निर्मलाकी आमा दुर्गादेवी पन्त र बुबा यज्ञराज पन्त अनिश्चितकालिन धर्नामा बसेका छन् ।

उनीहरुको धर्नामा अधिकारकर्मीले पनि साथ दिएका छन् । धर्नामा बसेका निर्मलाका परिवारको स्वास्थ्य अवस्था कमजोर भएपछि चिकित्सकको टोलीलले उनीहरुको स्वास्थ्य परीक्षण गरेको छ । बिहीबार महाकाली अञ्चल अस्पतालका चिकित्सकको टोलीले धर्ना स्थलमै उनीहरुको स्वास्थ्य परीक्षण गरेको हो । चिकित्सकका अनुसार उनीहरुको स्वास्थ्य अवस्था बिग्रदै गएको छ ।

‘खानाको मात्रा नमिलेकाले उनीहरुको ब्लडप्रेसर कम हुँदै गएको छ’ थप परीक्षणको लागी रगत लिइएको छ,’ उपचारमा संलग्न चिकित्सक किशोर बोहराले भने । स्वास्थ्य अवस्था कमजोर हुँदा पनि उनीहरुले धर्ना तोड्न मानेका छैनन् । ‘छोरीको हत्यारा सार्वजनिक नभएसमम्म धर्नामै बस्छौं,’ निर्मलाकी आमा दुर्गाले भनिन् ।

उनले आफूहरुले न्याय पाउने कि नपाउने सरकारसँग जवाफ माग गरिन् । न्याय नपाएसम्म धर्नामै बस्ने उनीहरुको अडान छ । निर्मलाको हत्या भएको ११२ दिन बित्यो तर हत्यारा पहिचान हुन सकेको छैन । उता, जिल्ला प्रहरी कार्यालय कञ्चनपुरले घटनाका विषयमा अनुसन्धान भइरहेकाले दोषीलाई पक्राउ गर्ने बताएको छ ।

पछिल्लो समय विभिन्न व्यक्तिको डीएनए परिक्षण गरिएको जनाएको छ । तर उनीहरुको नाम सार्वजनिक गरिएको छैन । गत साउन १० गते साथी रोशनी बमको घरमा गएकी निर्मला भोलीपल्ट मृत अवस्थामा फेला परेकी थिइन् ।

प्रकाशित समय १५:३४ बजे