चितुवाको आक्रमणबाट तनहुँमा शनिबार राति एक बालकको मृत्यु भएको छ । तनहुँको भानु नगरपालिका-२, ढल्केवरका १० वर्षीय अमृत गुरुङको डुम्रेस्थित लक्ष्मी अस्पतालमा उपचारका क्रममा मृत्यु भएको जिल्ला प्रहरी कार्यालय तनहुँका प्रहरी नायब उपरीक्षक श्यामु अर्यालले जानकारी दिए ।

खाना खाएर हात धुन आँगनमा निस्केका गुरुङलाई चितुवाले आक्रमण गरेर लगेको थियो । छोरा घरभित्र नआएपछि बाबु माइला गुरुङले प्रहरीलाई खबर गरेका थिए । प्रहरी र स्थानीयवासीको सहयोगमा खोजतलास गर्दा घरभन्दा केही तल रहेको खोल्सामा अमृतले लगाएको ज्याकेट भेटिएको थियो । खोल्साभन्दा तल अमृत घाइते अवस्थामा भेटिएका थिए । उनको घाँटीमा चितुवाले चिथोरेको थियो ।

भानु नगरपालिकामा चितुवाको त्रास बढेको छ । चितुवाको आक्रमणबाट १७ दिनको अवधिमा दुई जनाको ज्यान गएपछि स्थानीयवासी त्रसित भएका हुन् ।

कात्तिक २९ गते पनि चितुवाको आक्रमणबाट भानु नगरपालिका-४, जोखानेका चार वर्षीया बालिका रञ्जिता लम्सालको मृत्यु भएको थियो । मंसिर १ गते पनि भानु नगरपालिका-२ का सात वर्षीय सञ्जन नेपालीलाई पनि चितुवाले आक्रमण गरी घाइते बनाएको थियो ।

प्रकाशित समय ०७:४६ बजे