सरकारले मेलम्ची आयोजनाको सुरुङमार्ग निर्माणको जिम्मा पाएको इटालिएन कम्पनी सीएमीसँग ठेक्का सम्झौता तोडेको छ ।

मेलम्ची खानेपानी विकास समितिले सीएमसीसँगको ठेक्का तोडी उसको बैंक धरौटीसमेत जफत गर्ने निर्णय गरेको हो । फर्किन दिइएको १४ दिनको समयसीमामा काम छाडेर भागेको ठेकेदार कम्पनी सीएमसीका कर्मचारी नआएपछि ठेक्का सम्झौता तोडेको आयोजनाले जनाएको छ । सम्झौता गर्दा सीएमसीले करिब साढे दुई अर्ब रुपैयाँ धरौटी राखेको थियो । समितिले आज बैंकलाई पत्र पठाएर सो रकम जफत गर्ने जनाएको छ ।

सरकारले माघ ६ गते दुई हप्तामा काममा फर्किन अल्टिमेटम दिएको थियो । अन्तिम म्याद सकिँदासम्म सीएमसीले जवाफ नदिएपछि ठेक्का तोडिएको आयोजनाले जनाएको छ ।

ठेक्का तोडिए पनि आयोजना कसरी अघि बढाउने भन्नेबारे खानेपानी मन्त्रालय र समिति कुनै निर्णयमा पुग्न सकेको छैन । सुरुङको फाइनल फिनिसिङलगायत काममा अन्योल छ । मेलम्चीको २७ किमि सुरुङ छिचोलिइसकेको छ ।

प्रकाशित समय ०७:०५ बजे