फ्रेन्च क्लब पेरिस सेन्ट जर्मेन (पीएसजी)लाई स्तब्ध बनाउँदै च्याम्पियन्स लिग फुटबलको उपाधि जर्मन क्लब बायर्न म्युनिखले जितेको छ । आइतबार राति भएकाे फाइनलमा बायर्नले १-० गोल अन्तरले नतिजा आफ्नो पक्षमा पारेकाे हाे ।

पोर्चुगलको राजधानी लिस्बनस्थित स्टाडियो डा लुज रंगशालामा बायर्नलाई उपाधि दिलाउन किंगस्ले कोमानले ५९औं मिनेटमा गरेको एकमात्र गाेल निर्णायक बन्यो । उनले जोसुवा किमिचको पासमा हेडरमार्फत बललाई जाली चुमाए ।

दुवै टोलीले गोलको अवसरहरू खेर फालेपछि पहिलो हाफ गोलरहित बराबरीमा सकिएको थियो । पहिलो हाफमा पीएसजीले तुलनात्मक रुपमा बढी अवसर प्राप्त गरे पनि त्यसलाई सदुपयोग गर्न सकेन । दोस्रो हाफमा बायर्नले केही आक्रमक खेलेकाे थियाे ।

यस सँगै बायर्नले छैटौंपटक च्याम्पियन्स लिगको उपाधि जित्न सफल भएको छ । यसअघि बायर्नले १९७४, १९७५, १९७६, २००१ र २००१३ मा उपाधि जितेको थियो । पीएसजी भने पहिलोपटक फाइनल पुगेकाे हाे ।सेमीफाइनलमा बायर्नले लियोनलाई र पीएसजीले आरबी लाइपजिगलाई पराजित गरकाे थियाे ।

प्रकाशित समय १२:१३ बजे