कानुन, न्याय तथा संसदीय मामिला मन्त्री शेरबहादुर तामाङ आफ्नै अभिव्यक्तिका कारण विवादमा तानिएका छन् । आइतबार राजधानीको एक कार्यक्रममा मन्तव्य दिने क्रममा उनले डा. गोविन्द केसीको अनसन र मेडिकल शिक्षाको प्रशंग जोड्दै बंगलादेशमा अध्ययन गर्न जाने नेपाली छात्राहरु शरिर बेच्न बाध्य रहेको बताएका थिए । यही अभिव्यक्तिबाट चर्को आलोचनामा परेका मन्त्री तामाङसँग न्युज कारोबारले गरेको कुराकानी :

मेडिकल शिक्षा अध्ययनका लागि बंगलादेश पुग्ने विद्यार्थीका थुप्रै समस्या छन् । तीमध्ये कतिपय समस्या हल गर्न नीतिगत रुपमै सुधारको खाँचो छ । म देशको कानुनमन्त्री हुँ । कानूनी रुपमै कतिपय गलत कुरालाई सही ट्रयाकमा ल्याउनु मेरो कर्तव्य हो । मसँग अहिले पनि कतिपय अविभावक आफ्ना छोराछोरी विभिन्न बाध्यतामा फसेको भन्दै गुनासो गर्ने गरेका छन् ।

विभिन्न प्रलोभन र सर्तमा घटना भएको प्रमाण हाम्रासामु जगजायर छ । केही समय पहिले अध्ययन गर्दै गरेकी एक छात्राले बंगलादेशमा आत्महत्या गरिन् । हो, यस्ता घटनाले बंगलादेशमा बेथिति छ भन्ने आशय मेरो हो । मेरो अभिव्यक्तिबाट कसैलाई ठेस लागेको भए सार्वजनिक रुपमा माफी समेत मागिसकेको छु ।

मैले सबैलाई सामान्यीकरण गर्न खोजेको होइन । बंगलादेशमा नेपाली छात्राहरुको समस्यालाई नीतिगत रुपमै समाधान गर्नुपर्छ भनेर म लागेको छ । केही काम पनि अघि बढाउँदैछ । र अहिले पनि के कुरामा अडिग छु भने डक्टरको सर्टिफिकेट लिन जाने विद्यार्थीहरु बंगलादेशमा ठूलो समस्यामा छन् । यसलाई समाधान गर्न म लागिपरेको छु र समाधान नभएसम्म लागिरहनेछु ।

प्रकाशित समय ०९:३७ बजे