स्थायी शिक्षकका लागि लिइएको लिखित परीक्षामा ‘फेल’ भएका झण्डै १० हजार शिक्षकलाई सरकारले उपदानसहित बिदाइ गर्ने तयारी थालेको छ । लिखित परीक्षामा असफल भएका शिक्षकलाई उपदानसहित बिदाइ गर्न २५ करोड रुपैयाँ छुट्याइएको शिक्षा मन्त्रालयले जनाएको छ । शिक्षा तथा मानव स्रोत विकास केन्द्रका महानिर्देशक बाबुराम पौडेलका अनुसार २०७६ असार मसान्तसम्म अस्थायी शिक्षकलाई बिदाइ गर्ने गरी तयारी अघि बढाइएको हो ।

‘लिखित परीक्षामा असफल भएका शिक्षकलाई उपदानसहित बिदाइ गर्ने तयारी अघि बढाइएको छ,’ उनले न्युज कारोबारसँग भने, ‘त्यसका लागि पाँच अर्ब २५ करोड रुपैयाँ छुट्याइएको छ र आगामी असार मसान्तपछि उहाँहरुलाई बिदाइ गरिने छ ।’

अहिले मुलकभर सामुदायिक विद्यालयमा ४७ हजार १ सय २ शिक्षक अपुग छन् । सरकारले केही समयअघि गठन गरेको कार्यदलले अपुग शिक्षकको तथ्यांक संकलन गरेको थियो । अपुग शिक्षकको तथ्याङ्कसहितको प्रतिवेदन कार्यदलले मन्त्रिपरिषद्मा बुझाइसकेको छ । शिक्षा नियमावलीले कायम गरेको शिक्षक अनुपातअनुसार भने ३४ हजार ४०८ शिक्षक अपुग देखिएको महानिर्देक पौडेलले जानकारी दिए ।

प्रकाशित समय १३:१३ बजे