सरकारले धान उत्पादनमा यो वर्ष १५ लाख टनले वृद्धि गरी ७० लाख टन पु-याउने लक्ष्य लिएको छ । तर, असार १५ सम्म करिब १२ प्रतिशत धानखेतमा मात्र रोपाइँ भएको छ । गत वर्ष यो अवधिमा १५.०९ प्रतिशत रोपाइँ भएको थियो भने धान उत्पादन ५६ लाख टन हाराहारी भएको कृषि तथा पशुपन्छी विकास मन्त्रालयले जनाएको छ ।

असार १५ सम्म पनि पानी पर्याप्त नपरेकाले यो वर्ष रोपाइँमा ढिलाइ भएको हो । मन्त्रालयका सहप्रवक्ता प्रदीपचन्द्र भट्टराईका अनुसार अन्नको भण्डार मानिने तराईमा जम्मा ९.५९ प्रतिशत रोपाइँ भएको छ । तराईमा १० लाख ९४ हजार ६३६ हेक्टरमा धान रोपाइँ हुनेमा मध्य असारसम्म १ लाख ५ हजार हेक्टरमा मात्र रोपाइँ भएको उनले जानकारी दिए ।

संघीयताको कार्यान्वयनसँगै सिँचाइ, मलखाद र बीउबिजन स्थानीय तहको पहुँचमा भएकाले उत्पादन वृद्धि हुने मन्त्रालयको अपेक्षा छ । तर, कृषकले खडेरी र मलखादको दुवैको समस्या झेलिरहेका छन् । सरकारले तामझामका साथ धान दिवस मनाइरहँदा सबैभन्दा बढी धान उत्पादन हुने झापा र रुपन्देहीदिख सुनसरी, इलाम, उदयपुर, बारा, काभ्रे, मकवानपुर, चितवन, बाँके, बर्दिया, दाङ, सुर्खेत र कञ्चनपुरसम्मका कृषक मल अभावको समस्यामा छन् ।

प्रकाशित समय ०९:२९ बजे