सेयर किनबेचमा आजदेखि नयाँ पुँजीगत लाभकरको व्यवस्था लागू भएको छ । साउन १ गतेदेखि साढे सात प्रतिशतको सट्टा पाँच प्रतिशत पुँजीगत लाभकर लगाउँदा भारित औसत लागत गणना विधि लागू भएको हो । नयाँ व्यवस्थाअनुसार हकप्रद र बोनस सेयरसमेत भारित औसत विधिबाट गणना भई पुँजीगत लाभकर तय हुने केन्द्रीय निक्षेप प्रणाली (सिडिएससी)ले जनाएको छ ।

सिडिएस एण्ड क्लियरिङले सम्पूर्ण सेयर दलाललाई साउन १ गतेदेखि हुने धितोपत्र कारोबारको पूँजीगत लाभकर गणना गर्दा सोही विधिअनुसार गर्ने व्यवस्था मिलाउन निर्देशन दिइसकेको छ । सरकारले चालू आर्थिक वर्ष २०७६/७७ को बजेटमार्फत गरेको नीतिगत व्यवस्था सिडिएससीले कार्यान्वयनमा ल्याएको हो ।

सरकारले चालू आवको बजेटमा यसअघि प्राकृतिक व्यक्तिलाई लाग्दै आएको ७.५ प्रतिशत पुँजीगत लाभकर घटाएर ५ प्रतिशत कायम गरेको छ । संस्थागत लगानीकर्ताको हकमा भने यसअघि कायम १० प्रतिशत नै कायम छ ।

कसरी हुन्छ गणना ?

मानौं प्रतिकित्ता १ सय रुपैयाँका दरले कुनै कम्पनीको सय कित्ता सेयर किनियो भने लागत मूल्य १० हजार रूपैयाँ पर्छ । अब कम्पनीले शतप्रतिशत हकप्रद दियो भने लगानीकर्तासँग २ सय कित्ता सेयर हुन्छ । हकप्रदसहितको जम्मा लागत २० हजार (भारित औसत मूल्य) हुन्छ । नयाँ व्यवस्थाअनुसार कम्पनीले हकप्रदपछि बोनस बाँड्यो भने बोनसको पनि प्रतिकित्ता सय रूपैयाँका दरले भारित औसत मूल्य गणना हुनेछ । लगानीकर्ताले प्रतिकित्ता भारित औसत मूल्यभन्दा बढीमा सेयर बेचेमा पुँजीगत लाभकर तिर्नुपर्ने हुन्छ । लागत मूल्य २० हजार भएकोमा यति २५ हजारमा सेयर बिक्री गरियो भने नाफाबापतको ५ हजारमा ५ प्रतिशतका दरले पुँजीगत लाभकर लाग्नेछ ।

प्रकाशित समय ०९:०६ बजे