संसदीय समितीले धनुषा जिल्ला खेलकुद विकास समितिको कभर्ड हलको निरीक्षण गरेको छ । प्रतिनिधिसभा सदस्य जीवनराम श्रेष्ठको संयोजकत्वमा गठित ओलम्पिक कमिटिको टोलीले सोमबार जनकपुरधाम –१३ पिडारीस्थित कभर्ड हलको अनुगमन तथा निरीक्षण गरेको हो । जनकपुरमा १३औँ सागअन्तर्गत कुस्ती खेल हुने तय भएको छ ।

सांसद श्रेष्ठले देशकै गौरवको रुपमा पहिलोपटक उपत्यकाबाहिर हुन लागेको सागको तयारी समयमै पूरा भइसक्ने बताए । तयारीअन्तर्गत करिब ९० प्रतिशत काम सम्पन्न भइसकेको उनको भनाइ छ । कभर्ड हलको क्षमता कम भएकाले स्क्रिन पनि राख्ने व्यवस्था भइरहेको खेलकुद परिषदका उपनिर्देशक बाबुराम नेपालले बताए ।

टोलीले जनकपुरमै करिब साढे ६ अर्बको लगानी र १७ विगाह क्षेत्रमा निर्माण हुन लागेको श्री रामजानकी अन्तर्राष्ट्रिय रंगशाला रजौलको समेत निरीक्षण गरेको छ । ५०१ मिटरको धनुष आकारमा निर्माण हुने सो रंगशाला ५ हजार ५ सय सिट क्षमताको हुने बताइएको छ ।

प्रकाशित समय ११:५५ बजे