१३औँ दक्षिण एसियाली खेलकुद (साग)को तेस्रो दिन मंगलबार पनि नेपालले पदककाे अपेक्षा गरेको खेलहरू हुँदैछन् । मंगलबार हुने तेक्वान्दो, कराँते, उसु र एथ्लेटिक्समा नेपालले स्वर्णको अपेक्षा गरेको खेलहरू हुन् ।

आज नेपालले फुटबल, क्रिकट र भलिबलमा पनि प्रतिस्पर्धा गर्दैछ । पुरूष फुटबलतर्फ घरेलु टोली नेपालले भुटानसँग प्रतिस्पर्धा गर्दैछ । खेल त्रिपुरेश्वरस्थित दशरथ रंगशालमा दिउँसो १ बजे हुनेछ । महिला फुटबल पनि मंगलबारदेखि नै पोखरामा सुरु हुँदैछ । नेपालले पहिलो खेलमा श्रीलंकाको सामना गर्दैछ ।

कीर्तिपुरस्थित टीयू मैदानमा सुरु हुने क्रिकेटको पहिलो खेलमा नेपालले श्रीलंका यू-२३ सँग प्रतिस्पर्धा गर्दैछ । पुरूष क्रिकेटमा भारत र पाकिस्तान सहभागी छैनन् । सन् २०१० मा ढाकामा भएको ११औँ सागमा समावेश भएको क्रिकेट ९ वर्षपछि पुनरागमन भएको हो । सागमा पहिलोपटक समावेश गरिएको महिला क्रिकेट सोमबारदेखि नै पोखरामा सुरु भइसकेको छ ।

भलिबलमा पुरूष र महिलातर्फको फाइनल खेल पनि मंगलबार नै हुँदैछ । ४ बजे पुरूष फाइनलमा भारत र पाकिस्तानबीच खेल हुनेछ । नेपालको पुरूष टोली भने समूह चरणबाटै बाहिरिसकेको छ । त्रिपुरेश्वरस्थित राखेपको कभर्डहलमा हुने फाइनलमा महिलातर्फ घरेलु टोली नेपालले दिउँसो २ बजे भारतसँग स्वर्णको लागि खेल्नेछ ।

महिला फुटबल प्रतियोगिता भने पोखरामा सुरु हुँदैछ । महिला फुटबल प्रतियोगिताको पहिलो दिन मंगलबार आयोजक राष्ट्र नेपालले श्रीलंकासँग भिड्दै छ । एथ्लेटिक्सका खेलहरू पनि दशरथ रंगशालाको ट्रयाकमा मंगलबारदेखि सुरु हुने तय भएकाे छ ।

यसबाहेक सोमबार नेपालले ७-७ स्वर्ण जितिसकेकाे कराँते र तेक्वान्दोका बाँकी खेल पनि मंगलबार हुनेछ । उसुका खेल पनि आजदेखि नै सुरु हुनेछन् ।

प्रकाशित समय ११:१२ बजे