भ्रमणमा आएर ज्यान गुमाएका पर्यटकको सम्पूर्ण विवरण पठाउन कम्पनीलाई पर्यटन विभागले सात दिने अल्टिमेटम दिएको छ । पर्यटन विभागले शुक्रबार सूचना जारी गर्दै सात दिनमा कम्पनीहरुले विवरण नपठाएका कारबाही गर्ने चेतावनी दिएको छ ।

हिमशृंखला, उच्च भूभागमा, बेँसीतिरका जुनसुकै ठाउँमा पनि पर्यटकको ज्यान गए पनि कम्पनीले व्यक्तिको सम्पूर्ण विवरण १५ दिनभित्र सरकारको आधिकारिक निकाय पर्यटन विभागमा विवरण पेस गर्नुपर्ने प्रावधान छ ।

पर्यटक खोज उद्धार उपचार तथा अनुगमनसम्बन्धि कार्यविधि २०७५ को दफा ८ बमोजिम खोजी उद्धार तथा उपचारमा संलग्न निकायले पर्यटकको उद्धार तथा उपचार गरेका पर्यटकको विवरण सिजन समाप्त भएको १५ दिनभित्र भित्रमा पेस गर्नुपर्छ ।

त्यस्तै कार्यविधिको दफा ९ मा उल्लेखित बिमा दाबी गर्न एजेन्सीले दाबी गरेको बिमाको विवरण प्रत्येक महिना विभागलाई पठाउनुपर्ने प्रावधानअनुसार अहिलेसम्म कुनै निकायले पनि विवरण नपाएको पर्यटन विभागका प्रवक्ता सुरेन्द्र थापाले बताएका छन् ।

उनका अनुसार पर्यटक खोज उद्धार उपचार तथा अनुगमनसम्बन्धि कार्यविधि २०७५ बमोजिम पेस गर्नुपर्ने हुन्छ । सन् २०१९ को शरद ऋतुका सेप्टेम्बर अक्टुबर र नोभेम्बर को सम्पूर्ण विवरण ७ दिनभित्र मन्त्रालयमा पठाउन पर्यटन विभागले अल्टिमेटम जारी गरेको छ ।

पर्यटन विभागले जारी गरेको सूचनामा भनिएको छ, ‘पर्यटक खोज, उद्धार उपचार तथा अनुगमनसम्बन्धी कार्यविधि २०७५ को दफा ८ मा सम्बन्धित निकायलाई उल्लेखित विवरण र लागत समय खुल्ने गरी पछि फरक नपर्ने गरी आजका मितिले ७ दिनभित्र उपलब्ध गराउन हुन अनुरोध गर्दछौं ।’

जारी गरेको ७ दिनमा पनि कम्पनीहरुले ज्यान गुमाएका, उद्धार गरिएका पर्यटकको कुनै विवरण पेस नगरेमा कानुन बमोजिम कारबाही गरिने विज्ञप्तिमा उल्लेख गरिएको छ ।

प्रकाशित समय १७:०९ बजे