चीनबाट फैलिएको नोबेल कोरोना भाइरससँग मिल्दाेजुल्दाे लक्षण नेपालमा पनि देखिएको छ ।

चीनसँग सिमाना जोडिएको सिन्धुपाल्चोक जिल्लामा कोरोना भाइरसको संक्रमणसँग मिल्दोजुल्दो लक्षण देखिएको भएपछि गाउँपालिकाले सहयोगका लागि पत्राचार गरेको छ ।

सिन्धुपाल्चोकको जुगल गाउँपालिकाको वडा नम्बर ३ मा कोरोना भाइरसको संक्रमणका लक्षण देखिएको छ । जुगल गाउँपालिका अध्यक्ष होमनारायण श्रेष्ठले हालसम्म २०१ जनामा कोरोना भाइरसको संक्रमणको लक्षण देखिएको बताएका छन् ।

उनका अनुसार स्थानीय स्वास्थ्य चौकीको सम्पर्कमा पुगेका त्यस्ता बिरामीले औषधि सेवन गरे पनि निको भएको छैन ।

कोरोना संक्रमितमा जस्तो लक्षण बिरामीमा भेटिएपछि गाउँपालिकाले मंगलबार यसको पहिचान गरिदिन आग्रह गर्दै स्वास्थ्य तथा जनसंख्या मन्त्रालयलाई पत्राचार गरेको उनले बताए । पत्रमा सोमबारबाट यस्ता बिरामी भेटिएकाले पहिचानमा सघाइदिन आग्रह गरिएको छ ।

मन्त्रालयले भने सिन्धुपाल्चोकमा कोरोना भाइरसका संक्रमितमा जस्तो लक्षणका बिरामी भेटिएको हल्ला सुने पनि औपचारिक जानकारी भने नआएको बताएको छ ।

प्रकाशित समय ०९:०४ बजे