कोरोना भाइरसको विश्वव्यापी प्रकोपसँगै प्रभावित आर्थिक गतिविधिका कारण अमेरिकाको केन्द्रीय बैंक संघीय रिजर्बले चालेको संकटकालीन कदमसँगै वाल स्ट्रिट स्टक मार्केटमा १० प्रतिशतको गिरावट आएको छ ।

विश्वभर फैलिएको नोवेल कोरोनाभाइरस (कोभिड-१९) सँग लड्न अमेरिकी केन्द्रीय बैंक फेडेरल रिजर्भ (फेड)ले आपतकालीन रुपमा ब्याजदर घटाउँदै ०.२५ कायम गरेपछि आइतबार स्टक बजारमा तीव्र गिरावट आएको हो । अमेरिकाले अर्थतन्त्रमा परेको असर न्यूनीकरणका लागि ७ खर्ब डलरको आर्थिक सहायता कोषको पनि घोषणा गरेको छ । अमेरिकाको यो कदम बेलायत, जापान, युरो क्षेत्र, क्यानडा र स्विट्जरल्यान्डसँग गरिएको सहकार्यको एक अंश हो ।

फेडका प्रमुख जेरोम पावेलले महामारीले अमेरिकाको अर्थतन्त्रमा नकारात्मक असर कम गर्न यो योजना ल्याइएको जानकारी गराएका छन् । उनका अनुसार ब्याजदर ० देखि ०.२५ को बीचमा राख्ने निर्णय भएको छ ।

आइतबार करिब २० मिनेटको कारोबारमै डो जोन्सको औद्योगिक कारोबार औसतमा २०६६९.४२ अंक अर्थात् १०.९ प्रतिशतमा झरेको थियो । त्यसपछिको १५ मिनेटमा भने स्टक कारोबारमा सामान्य सुधार देखिएको थियो ।

समग्रमा एस एन्ड पी को कारोबारमा १० प्रतिशत गिरावट भई २४२२.६९ अंक देखिएको छ भने प्रविधिमा सम्पन्न नासाक कम्पोजिट सूचकांकमा पनि १०.५ प्रतिशतको गिरावट भई ७०५१.७७ अंकमा सीमित भएको छ ।

एसिया र युरोपमा देखिएको सेयर बजारको गिरावटसँगै अमेरिकामा पनि सेयर बजारमा गिरावट सुरू भएको हो । खासगरी फ्रान्स र स्पेनमा कोरोनाभाइरसका कारण परेका असरहरूले अमेरिकी सेयर बजारमा पनि प्रभाव विश्लेषकहरूले बताएका छन् ।

यसअघि मार्च ३ मा पनि फेडले आपतकालीन रुपमा ब्याजदर ०.५ प्रतिशत अंकले घटाउने निर्णय गरेको थियो । यो सन् २००८ वित्तीय संकटयता गरिएको पहिलो आपतकालीन ब्याजदर कटौतीको निर्णय थियो ।

यसैबीच, अमेरिकी राष्ट्रपति डोनाल्ड ट्रम्पले फेडको यो निर्णयले आफूलाई निकै खुसी बनाएको बताएका छन् । कोरोनाभाइरसको महामारी फैलिएसँगै सेयर बजार पनि उल्लेख्य घटेका छन् ।

प्रकाशित समय ०७:५० बजे