कोरोनाको कारण अन्तर्राष्ट्रिय बजारबाट चिया खरिदका लागि माग नआउँदा चिया निकासीमा समस्या देखिएको छ । नेपालमा उत्पादन हुने चियाको ठूलो हिस्सा विदेश निर्यात हुने गरेपनि यस पटक भने ‘स्वचालित’ ढंगले चिया निकासी हुन सकेको छैन ।

चैतको सुरुवातदेखि नै अन्तर्राष्ट्रिय बजारका लागि ठूलो परिमाणमा चियाको माग आउँथ्यो । त्यसपछि उद्योगीले चियाको ‘सिम्बोल’ पठाउँथे र चिया निकासी सुरु हुन्थ्यो । यस वर्ष भने असार मसान्त हुन लाग्दासमेत चिया पठाउन सकस परेको छ । भारतबाट निकासी हुने चियामा समस्या हटे पनि नेपालकै अन्तर्राष्ट्रिय विनास्थलबाट पठाउने  चियामा भने समस्या रहेको चिया उद्योगी शरद सुब्बा बताउँछन् । ‘हामी चीनलगायत तेस्रो मुलुकमा तयारी चिया पठाउँछौँ तर यो वर्ष अन्तर्राष्ट्रिय ठप्प हुँदा अझैसम्म पनि पठाउन सकिएको छैन,’ उनले भने, ‘एक ठाउँमा सिम्बोल पठाए पनि कोरोनाका कारण चिया पठाउन भने सकेको छैन ।’

त्यसो त चिया निकासीमा उद्यमीले सधैँ झन्झट खेप्नु नै पर्छ । कहिले भारतले नाका बन्द गर्दा त कहिले अन्तर्राष्ट्रिय बजारबाट माग नआउँदा, चिया निकासीमा समस्या पर्छ । यस वर्ष पनि भारतले काँकडभिट्टा नाका केही दिन बन्द गर्दा उद्योगीले समस्या भोग्नुपर्‍यो । अहिले भारतले नाका खोलेको भए पनि अन्तर्राष्ट्रिय बजारबाट माग आएको छैन ।

भारतको मुख्य बजार नयाँ कलकत्तामै कोरोना संक्रमण बढेपछि अहिले चिया जान रोक लागेको अर्का उद्योगी तथा बिक्रेता गोपाल कट्टेल बताउँछन् । ‘मैले त अस्तिको दिनमात्र यो सालको पहिलो चिया पठाएँ,’ उनले भने । सिजनकै समयमा कोरोना महामारी आइलागेपछि धेरैजसो उद्योगीले चिया पठाउन अझै पनि सकेनन् । चिया निकासी गर्न भन्सारमा समेत धेरै प्रक्रिया पुर्‍याउनु पर्नाले पनि सकस भएको देखिन्छ ।

अर्का उद्योगी उदय चापागाईं भने निकासी खुले पनि अन्तर्राष्ट्रिय बजार पुर्‍याउन समस्या पर्ने गरेको बताउँछन् । ‘एकचोटिको चियाचाहिँ गइसक्यो । लकडाउनकै समयमा भारतले चिया भन्सारमै रोकिदिएपछि पनि जान ढिला भयो,” चापागाईंले भने, ‘तर अहिले अवस्था सामान्य भइसक्यो ।’

नाका परिवर्तन गर्दा भन्सार खर्चिलो

अन्तर्राष्ट्रिय बजारमा काँकडभिट्टा हुँदै चिया जाने गरे पनि अहिले जोगमनी नाकाबाट निकासी हुने गरेको छ । नाका परिवर्तन गरेर चिया लानुपरेकाले भन्सारमा बुझाउने रकम भने खर्चिलो हुने गरेको उद्योगीको गुनासो छ । नाका परिवर्तन गरेपछि पहिलेको भन्दा ७० हजार हाराहारीमा खर्च बढी आउने गरेको सूर्योदय टी प्रोडक्सन एसोसिएसनका सचिव गोपाल कट्टेलले जानकारी दिए ।

केन्द्रीय चिया सहकारी संघका महासचिव रविन राई भने लकडाउनका कारण पहिलो सिजनमा करिब ६० किलो चिया बराबरको घाटा भएको बताउँछन् । लकडाउनले चिया उत्पादित जिल्लामध्ये तराई क्षेत्रका जिल्लामा चियामा बढी घाटा व्यहोर्नुपरेको महासचिव राईको भनाइ छ ।

प्रकाशित समय १५:५७ बजे