सरकारले विदेश जानेका लागि कोरोना संक्रमणको पीसीआर परिक्षण गर्न ११ वटा अस्पताललाई अनुमति दिएको छ । कारोना महामारीको समयमा पनि अत्यावश्यक कामका लागि विदेश नगई नहुनेहरुको लागि पीसीआर परिक्षण गर्न सरकारले ११ वटा अस्पताल तोकेको हो स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता डा.जागेश्वर गौतमका अनुसार तोकिएको शुल्क तिरेर पीसीआर परिक्षण गराउन सरकारले उपत्यकाभित्र वीर अस्पताल, पाटन अस्पताल र टिचिङ अस्पताललाई अनुमति दिएको हो । उपत्यका बाहिरका सेती अस्पताल, कोशी अस्पताल, नारायणी अस्पताल, पोखरा स्वास्थ्य विज्ञान प्रतिष्ठान, लुम्बिनी अस्पताल र सुर्खेतस्थित  कर्णाली प्रदेशिक जनस्वास्थ्य प्रयोगशालाले पनि पीसीआर परिक्षण गर्न अनुमति पाएका छन् ।

विदेशी नियोगमा काम गर्ने कर्मचारीहरुले भने निजी अस्पतालहरूमा पनि पीसीआर परीक्षण गराउन सक्नेछन् । ललितपुरस्थित स्टार अस्पताल र काठमाडौं मेडिकल कलेजलाई विदेशी नियोगमा काम गर्ने कर्मचारीहरुको पीसीआर परीक्षण गर्न अनुमति दिइएको छ । सरकारले तोकेको र अनुमतिप्राप्त अस्पतालमा मात्र पीसीआर गर्न आग्रह गरेको छ ।

प्रकाशित समय १८:१९ बजे