पदीय दुरुपयोग गरी गैरकानुनी तवरले सम्पत्ति कमाएको अभियोगमा संघीय आयोजना कार्यान्वयन एकाई विराटनगरका तत्कालीन इन्जिनियर काशीप्रसाद गुप्तासहित १३ जनाविरुद्ध विशेष अदालतमा मुद्दा दायर भएको छ । अख्तियार दुरुपयोग अनुसन्धान आयोगले १६ करोड ७२ लाख ५६ हजार ४९६ बराबरको अकुत सम्पत्ति कमाएको अभियोगमा उनीहरूविरुद्ध मुद्दा दायर गरेको हो ।

आयोजनाका प्रवक्ता तारानाथ अधिकारीका अनुसार २०३८ पुस १२ गते ओभरसियर पदबाट सरकारी सेवा प्रवेश गरेका गुप्ताले २०७६ असार ५ गतेसम्म पदमा बहाल रहँदासम्म गैरकानुनी तवरले सम्पत्ति आर्जन गरेको अनुसन्धानबाट खुलेकाले विशेष अदालतमा मुद्दा दायर गरिएको हो । आयोगका अनुसार गुप्ताको वैध आय एक करोड ११ लाख ६९ हजार ९६२ मात्रै हो भने १७ करोड ८४ लाख २६ हजार ४५९ बराबरको खर्च तथा लगानी गरेको पाइएको छ ।

वैधानिक आयबाट खर्च तथा लगानी घटाउँदा बाँकी रहन आउने १६ करोड ७२ लाख ५६ हजार ४९६ बराबरको रकमको स्रोत नखुलेको पाइएको छ । आयोगले गुप्ताका आफन्तहरु अञ्जुकुमारी महतो, उदितनारायाणप्रसाद रौनियार, चन्द्रेश्वर महतो, धिरजकुमार गुप्ता, प्रीतिकुमारी गुप्ता, डा. रचनाप्रसाह साह, विकासप्रसाद गुप्ता, विनयकुमार सिंह, विभा रानी, संगीता साह रौनियार र सन्तोषकुमार गुप्ताको नाममा खाता खोलेर १० करोड ४४ लाख ४३ हजार ७८३ बराबरको रकम लुकाइछिपाई राखेको पाइएको छ ।

आयोगले उनीहरुको सम्पत्ति जफत गरी हदैसम्मको कारबाहीको माग गरेको छ । यस्तै आयोगले नेपाल खानेपानी संस्थान पोखरा शाखामा कार्यरत प्रशासन सहायक कृष्णहरि वाग्लेले सेवाग्राहीसँग २५ हजार रुपैयाँ घुस लिएको अभियोगमा बिहीबार पक्राउ गरेको छ । आयोगले वाग्लेलाई पोखरा महानगरपालिका ट्याक्सी चोकबाट पक्राउ गरिएको र अनुसन्धान भइरहेको प्रवक्ता अधिकारीले जानकारी दिए ।

प्रकाशित समय १९:५४ बजे