सिन्धुपाल्चोकको बाह्रबिसे नगरपालिकामा मात्रै मनसुन सुरू भएयता १३ जनाको ज्यान गएको छ भने ३७ जना बेपत्ता भएका छन् । गए रातिमात्रै नगरपालिकाको ७ नम्बर वडा घुम्थाङमा पहिरो ११ जनाको शव भेटिएको भने अझै २१ जना बेपत्ता छन् ।

नागपुजेकी ६२ वर्षीया भक्तिमाया श्रेष्ठ र ९८ वर्षीया ट्याक्सी शेर्पा, विक गाउँका २३ वर्षीया जुनुमाया विक, २४ वर्षीय शुकलाल विक, ८ वर्षीय बालक सन्देश विक र ४० वर्षीया सर्किनी नेवारको शव भेटिएको जिल्ला प्रहरी कार्यालयका डीएसपी प्रकाश सापकोटाले जानकारी दिए । डीएसपी सापकोटाका अनुसार ६५ वर्षीय धनलाल नेवार, ६० वर्षीया हिरामाया नेवार र ४२ वर्षीया ज्ञानुमाया प्रधानको पनि शव फेला परेको छ ।

नगर प्रमुख निमफुन्जो शेर्पाका अनुसार लगातारको झरीका कारण गए राति भारी वर्षासँगै गएको पहिरोले घुम्थाङको नागपुजे, भीरखर्क र नेवार टोलमा घरहरु पुरिएका छन् । २४ वटा घर पूर्णरूपमा क्षति भएका छन् । बेपत्ताहरूको नेपाली सेना, सशस्त्र प्रहरी र नेपाल प्रहरीसहित स्थानीय युवाले खोजी गरिरहेका छन् ।

पहिरोमा परी घाइते भएका केहीलाई प्राथमिक स्वास्थ्य केन्द्र बाह्रबिसे ल्याइएको उनले बताए । ‘पहिरोपीडितलाई नजिकैको खुला ठाउँमा सारिएको छ । ४६ वटा टेन्टसहित राष्ट्रिय नेपाली युवा संघको टोलीले पीडितलाई खाने–बस्ने व्यवस्था गरेको छ,’ उनले भने । आइतबार सभामुख अग्निप्रसाद सापकोटाले पनि घटनास्थलको अनुगमन गरेका छन् । उनले पनि राहतका लागि अश्वासन दिएका छन् ।

मनसुनयताको विनास

असार २५ गते पनि सिन्धुपाल्चोकको बाह्रबिसे नगरपालिका ५ जम्बुमा पहिरो जाँदा ठूलो संख्यामा जनधनको क्षति भयो । पहिरोमा बेपत्ता भएका दुई जनाको शव फेला पर्‍यो भने १८ जनाको अहिलेसम्म पनि कुनै पत्तो छैन । नगरपालिका प्रमुख शेर्पाका अनुसार एक्कासि गएको पहिरोले २१ घरमा पूर्ण क्षति पुगेको थियो भने पक्की पुलसहित चौपायामा ठूलो संख्यामा क्षति भएको छ ।

पहिरोमा ज्यान गुमाउने दुई जना एकै परिवारका बुबाछोरी थिए । २५ वर्षीय निकेश बस्नेत र उनकी ३ वर्षीया छोरीको शव फेला परेको थियो । बाँकी अहिलेसम्म भेटिएका छैनन् ।

असार २५ गते पहिरोमा बेपत्ता हुनेहरुमा बाह्रबिसेका भीमबहादुर वाइबा, चिनिमाया वाइबा, लीलामाया वाइबा, पासाङ डोल्मा वाइबा, निमा डोल्मा वाइबा, लक्ष्मण वाइबा, सुनमाया वाइबा, जनकबहादुर वाइबा र सविना तामाङ छन् । यस्तै, हिमेश शर्मा, आकाश तामाङ, आकाश केसी, तोकबहादुर तामाङ, युक्तकुमार तामाङ, सुवेश तामाङ र शलिना तामाङ पनि पहिरोमा हराइरहेका छन् । भोटेकोसी गाउँपालिका बुर्कुटेका निमादोर्जे तामाङ, मञ्जु तामाङ, पासाङ नोर्बु तामाङ र सहिल तामाङसमेत पहिरोमा बेपत्ता भएको प्रहरीले जनाएको छ ।

प्रकाशित समय १८:४७ बजे