बहुप्रतीक्षित क्षेत्रीय सहरी विकास आयोजनाअन्तर्गतका सडकको निर्माण कार्य बिहीबारबाट धनगढीमा सुरु भएको छ । धनगढी उपमहानगरपालिकालाई स्मार्ट सिटीको रुपमा विकास गर्ने कार्यक्रमको रुपमा यो परियोजनालाई लिइएको छ । पहिलो चरणमा धनगढीमा साढे १० किलोमिटर सडक निर्माणको ठेक्का भई बिहबिारदेखि काम सुरु भएको हो । परियोजनाको धनगढी उपमहानगरपालिकाका नगर प्रमुख नृपबहादुर वड र उपप्रमुख सुशीला मिश्र भट्टले क्याम्पस गेट-चटकपुर सडकको शिलान्यास गरेका छन् ।

एसियाली विकास बैंकको सहयोगमा सञ्चालन भइरहेको क्षेत्रीय सहरी विकास आयोजनाअन्तर्गत धनगढी उपमहानगरपालिकामा ४२ किलोमिटर सडक विस्तारका लागि २०१५ मा सम्झौता भएको थियो । सम्झौता भएको भएको लामो समय बित्दा पनि सडक निर्माणको काम अघि बढ्नसकेको थिएन । सन् २०१५ मा छुट्टयाइएको एक अर्ब ३५ करोड रुपैयाँ बजेट अपुग हुने भएकाले सडक निर्माणको काम चरणबद्ध रुपमा अघि बढ्ने नगर प्रमुख वडले बताए । उनका अनुसार चाँडै दोस्रो चरणका सडक निर्माणका लागि टेन्डर हुँदै छ ।

पहिलो चरणमा ठेक्का पाएको कालिका कन्स्ट्रक्सनले सातवटा सडक निर्माण गर्नेछ । जसअन्तरगत चरणमा गुल्म-चर्च रोड (२ हजार ७ मिटर), धनगढी मेन रोड, ट्राफिक चौराहादेखि-कैलाली नाला (१ हजार ३८० मिटर), हुलाकी सडक-क्याम्पस रोड-जाखोरताल (७ सय मिटर), क्याम्पस रोड-चटकपुर (३ हजार ६५० मिटर), धनगढी-खुटिया स्याउले रोड (८७० मिटर), मालपोत रोड (४३० मिटर) र हसनपुर रोड (१ हजार १५० मिटर) स्तरीय सडक बन्ने क्षेत्रीय सहरी विकास आयोजना धनगढीका उपनिर्देशक श्यामचन्द्र बुढाथोकीले बताए । पहिलो चरणमा ६८ करोड ५ लाख ९८ हजार ७४ रुपयाँको ठेक्का कालिका कन्स्ट्रक्सनले पाएको छ ।

धनगढीका बाहिरी सडक विस्तार तथा कालोपत्रे बनाइसक्दा पनि क्षेत्रीय सहरी विकास परियोजनाको पर्खाइमा मुख्य बजार क्षेत्रका सडक विस्तार गर्न सकिएको थिएन । बजारभित्रका सडक मर्मत नहुँदा आवतजावतमा समस्या हुँदै आएको थियो । परियोजना सुरु भएसँगै त्यो समस्या समाधान हुने धनगढी ४ का रणबहादुर चन्दले बताए । यस आयोजना सम्पन्न भए धनगढी निकै सुन्दर बन्ने भन्दै उनले खुसी व्यक्त गरे ।

धनगढी १ का दीपक ओलीले पनि योजना कार्यान्वयन भएको भन्दै खुसी व्यक्त गरे । ‘योजना बल्ल सुरु भयो,’ उनले भने, ‘अब निर्माण कम्पनी र आयोजना तथा धनगढी उपमहानगरले सक्रियताका साथ लागेर काम समयावधिभन्दा पनि अघि नै सम्पन्न गर्नुपर्छ ।’

सडक क्षेत्राधिकारभित्र पर्ने संरचनाहरू घरधनीले आफैँ धमाधम भत्काउन थालेका छन् । कतिपय जिल्लामा घरधनीले सडक विस्तारका क्रममा मुआब्जा माग्दै मुद्दा मामिला गर्दा सडक निर्माण तथा विस्तारको काम अलपत्र परिरहेका बेला धनगढीमा भने सडक क्षेत्राधिकारभित्र पर्ने संरचना भत्काउन धरधनी आफैँ लागिपरेका हुन् ।

प्रकाशित समय १२:५८ बजे