खुल्ला हृदय शल्यक्रिया (ओपन हार्ट सर्जरी)का क्षेत्रमा ऐतिहासिक एवं महत्वपूर्ण सफलता नेपाली चिकित्सकले प्राप्त गरेका छन् । त्रिवि शिक्षण अस्पतालस्थित मनमोहन कार्डियोथोरासिस भास्कुलर एण्ड ट्रान्सप्लान्ट सेन्टरमा नेपालको हालसम्मकै दुर्लभ खुल्ला हृदय शल्यक्रिया सफलतापूर्वक सम्पन्न गरी मुटु रोगका क्षेत्रमा नयाँ उपलब्धि प्राप्त भएको जनाएको छ ।

वरिष्ठ मुटु रोग विशेषज्ञ उपप्राध्यापक डा. अनिल भट्टराईको नेतृत्वमा रामेछाप सुनपाती गाउँपालिकाकी २४ वर्षीया गर्भवती प्रमिला अर्यालको शुक्रबार मुटुको शल्यक्रिया सफलतापूर्वक सम्पन्न गरेको हो ।

अर्याल ३७ हप्ताकी गर्भवती थिइन् । शल्यक्रियापछि अहिले आमा र शिशु (छोरा) दुवैको स्वास्थ्य अवस्था राम्रो रहेको डा. भट्टराईले जानकारी दिए ।

उनका अनुसार बिरामी अर्याललाई टाइप ए अरोटिक डिसेक्शन विथ प्रेगनेन्सी रोग लागेको थियो । यो अति दुर्लभ रोग हो । यो रोग लागेपछि बिरामी बाँच्ने सम्भावना अत्यन्तै न्यून हुन्छ ।

सेन्टर स्थापना भएपछि नौ वर्षको अवधिमा सो रोग लागेका बिरामीको पहिलो पटक यस प्रकारको शल्यक्रिया सफलतापूर्वक सम्पन्न हो । वरिष्ठ मुटु रोग विशेषज्ञ उपप्राध्यापक डा. भट्टराईले भने, ‘नवजात शिशु जन्मिँदा बेहोस थियो, तीन घण्टापछि शिशुको होस आएको छ, आमालाई अहिले भेन्टिलेटरबाट छुट्याएर आइसियूमा सारिएको छ ।’

आमा र बच्चा दुवै बचाउन सफल भएकामा खुशी व्यक्त गर्दै डा. भट्टराईले भने, ‘यो मेरो जीवनको अतिस्मरणीय र ऐतिहासिक सफलता हो, यस्तो दुर्लभ रोग लागेका बिरामीको सफल शल्यक्रिया गरेर नयाँ जीवन दिन पाउँदा आफूलाई खुशी लागेको छ, म मेरो टिमलाई धन्यवाद भन्न चाहन्छु ।’

सेन्टरका कार्यकारी निर्देशक प्रा. डा. उत्तमकृष्ण श्रेष्ठले दुर्लभ रोग लागेको बिरामीको सफल शल्यक्रिया सम्पन्न गरेर आमा र शिशु बचाउन सफल भएकामा खुशी व्यक्त गर्दै ओपन हार्ट सर्जरीका क्षेत्रमा ऐतिहासिक एवं महत्वपूर्ण सफलता प्राप्त गरेको बताए ।

उक्त शल्यक्रियामा डा. भट्टराईका साथमा डा. प्रभात खकुरेल, डा. रवि बराल र डा. निकेश भण्डारी थिए । यसैगरी एनस्थेसियातर्फ डा. विश्वास प्रधान, डा. विभुष श्रेष्ठ, डा. मन्दिरा बस्नेत, डा. प्रिष्का बास्तोला र डा. अर्जुन गुरुङ तथा गाइनोकोलोजीमा डा. ज्योति शर्मा, डा. बेखालक्ष्मी मानन्धर, डा. सुनिति रावल, डा. सुनिता बज्राचार्य र डा. सुभाना मास्के सहभागी थिए ।

त्यस्तै बालरोग विशेषज्ञ डा. प्रदीप पौडेल र डा. कविता मानन्धर उपचारमा संलग्न भएको सेन्टरले जनाएको छ ।

मुटुरोग विशेषज्ञ डा. भट्टराईले सामाजिक सेवामा सक्रिय रही असहाय, गरीब तथा दुर्गमका मुटुरोगीको निःशुल्क उपचार गरेका छन् । हालसम्म उनले ९० भन्दा बढी बिरामीको निःशुल्क मुटुको शल्यक्रिया गरिसकेका छन् ।

-रासस

प्रकाशित समय २०:२५ बजे