कतिं पूर्णिमा(कार्तिक पूर्णिमा)का उपलक्ष्यमा काठमाडौंको श्रीखण्ड तरुमूल महाविहारमा कतिंपुन्हीको महत्व तथा गौतम बुद्धको अभिधम्म देशनामा आधारित बौद्धस्तोत्रसम्बन्धमा बौद्धगुरुबाट धर्मदेशना गरिएको छ ।

शाक्यमुनि बुद्धले आफ्नी आमा रानी मायादेवीका गुणलाई स्मरण गरी ‘त्रायतृंसति भुवन’ नामक देवलोकमा गई तीन महीनासम्म अभिधम्म देशना गरेको बौद्धग्रन्थमा उल्लेख छ । त्यस अवसरमा बौद्धस्तोत्र पाठ गरिनाका साथै वज्रयान महासंघका अध्यक्ष राजेन्द्रमान बज्राचार्यले कतिंपुन्हीको महत्व तथा बुद्धको अभिधम्म विषयमा धर्मदेशना गरेका थिए ।

बौद्धविद्वान् राजेन्द्रमान बज्राचार्यले बौद्धग्रन्थमा आश्विन शुक्ल पूर्णिमा अर्थात् कतिंपुन्हीको विशेष महत्व रहेको उल्लेख भएको बताए । अभिधम्ममा गौतम बुद्धले मानिसको चिन्तन तथा चित्त सम्बन्धमा विशेष धर्मदेशना दिएको व्याख्या गरिएको छ । आश्विन शुक्ल पूर्णिमाका दिन बुद्धको चैत्य तथा महाविहारमा अभिधम्म सूत्र पाठ, विशेष पूजाका साथ दीप प्रज्वलन गर्ने परम्परा छ । रासस ।

प्रकाशित समय १५:५७ बजे