डाक्टर गोविन्द केसीको मागमा सुनुवाई नगरी राष्ट्रियसभाबाट पनि राष्ट्रिय चिकित्सा शिक्षा विधेयक पारित भएपछि केसीको अनसन तोडाउने विषयमा अन्योल बढेको छ ।

पूर्वानुमान अनुसार राष्ट्रियसभाले विहीबार चिकित्सा शिक्षा विधेयक पारित गरेको हो । अब राष्ट्रपति विद्यादेवी भण्डारीले प्रमाणित गरेपछि यो विधेयक कानुन बन्छ । यता २४ दिनदेखि आमरण अनसनमा रहेका डाक्टर गोविन्द केसीको अनसन तोडाउन भने सरकारले कुनै पहलकदमी लिएको छैन । अनसनको २४ दिनमा डा केसीको स्वस्थ्य अवस्था नाजुक बनेको छ । उनी पूर्वसहमति अनुसार चिकित्सा शिक्षा विधेयक संशोधन नभएसम्म अनसन नतोड्ने अडानमा छन् ।

राष्ट्रियसभाबाट बिहीवार विधेयक पास भएपछि प्रमुख प्रतिपक्षी दलका नेता तथा नेपाली कांग्रेसका सभापति शेरबहादुर देउवा डा केसीलाई भेट्न त्रिवि शिक्षण अस्पताल पुगेका थिए । उनले डा केसीलाई एकपक्षीय रुपमा भएपनि अनसन तोड्न आग्रह गरेका थिए । ज्यान नै तलमाथि पर्ने अवस्था आउँदासमेत सरकार डाक्टर केसीका मागमा संवेदनशिल नदेखिएको देउवाको भनाइ थियो । डा केसीले देउवालाई केही जवाफ दिन नसके पनि सहभागीहरुलाई भने अनसन नतोड्ने अडान दोहोर्याएका थिए ।

विधेयक पास हुनुअघि राष्ट्रिय सभामा सम्बोधन गर्दै शिक्षामन्त्री गिरिराजमणि पोखरेलले डा केसीको जीवनरक्षाप्रति सरकार प्रतिवद्ध रहेको बताएका थिए । तर, सरकारका प्रवक्ता, सञ्चारमन्त्री गोकुल बास्कोटाले वार्ताको विषयको सट्टा अनसन तोडेर सिटामोल बोकेर जनतामाझ जान सुझाए । यसले सरकार तत्काल के गर्ने भन्ने विषयमै सरकार प्रष्ट नरहेको देखाउछ ।

नेपाल चिकित्सक संघको आन्दोलन
नेपाल चिकित्सक संघले शुक्रबारबाट देशभरका अस्पतालको आकस्मिकबाहेकका सेवा ठप्प पार्ने भएको छ । २४ दिनदेखि अनसनमा रहेका डा. गोविन्द केसीको जीवन रक्षामा सरकार उदासीन देखिएको भन्दै संघले आन्दोलनका कार्यक्रम घोषणा गरेको हो । संघ त्रिवि शिक्षण अस्पतालसहित देशभरका अस्पतालमा रिले अनसन बसिरहेको छ । माग सुनुवाइ नभए अझै कडा निर्णय गर्न बाध्य हुने संघको चेतावनी छ ।

देशभरका सरकारी, गैरसरकारी तथा निजी मेडिकल कलेजका आकस्मिक सेवा सञ्चालन गर्न नरोके पनि ओपीडीलगायतका अन्य सम्पूर्ण सेवा बन्द हुने संघले बताएको छ । संघले वार्ता र संवादबाट तत्काल डा केसीको जीवन रक्षा र समस्याको समाधान खोज्न सरकारलाई आग्रहसमेत गरेको छ ।

त्रिवि शिक्षण अस्पतालले भने बन्द, हडताल निषेध गर्दै बन्द र हड्तालमा उत्रिने चिकित्सक र कर्मचारीलाई कारबाही गर्ने चेतावनी दिएको बुझिएको छ ।

प्रकाशित समय ०९:५४ बजे