सत्तारुढ दल नेपाल कम्युनिष्ट पार्टी नेकपाले आज जनयुद्ध दिवसको अवसरमा देशभर कार्यक्रम गर्दैछ ।

केन्द्रीय कार्यालय धुम्बाराहीमा बिहान साढे १० बजेपछि अध्यक्ष पुष्पकमल दाहालसहितका नेताहरुको उपस्थितिमा श्रद्धाञ्जली कार्यक्रम तय भएको छ । नेकपाका अर्का अध्यक्षसमेत रहेका प्रधानमन्त्री केपी शर्मा ओलीभने कार्यक्रममा सहभागी नहुने बताइएको छ । प्रधानमन्त्री ओली रोजगार कार्यक्रममा जानुपर्ने भएकाले पार्टी कार्यालयमा उपस्थित हुन नसक्ने जनाएको नेकपाले जानकारी दिएको छ ।

नेकपाले एकतापछि पहिलोपटक औपचारिक रुपमा जनयुद्ध दिवस मनाउन लागेको हो । युद्ध सुरु भएको दिन फागुन १ गतेको सम्झनामा जनयुद्ध र जनआन्दोलनका शहीदको सम्मानमा पहिलोपटक कार्यक्रम गर्न लागेको नेकपाले जनाएको छ । माओवादी घटक दलले फागुन १ गते मा आ–आफ्नै तरिकाले जनयुद्ध दिवस मनाउँदै आएका छन् ।

मोहन वैद्य किरण नेतृत्वको क्रान्तिकारी माओवादीले काठमाडौंको शान्तिबाटिकामा कार्यक्रम गर्दैछ भने नेत्रविक्रम चन्द विप्लव नेतृत्वको नेकपाले पनि शान्तिबाटिकामै जनयुद्ध दिवस मनाउने जनाएको छ । बाबुराम भट्टराई नेतृत्वको नयाँ शक्ति नेपालले भने जनयुद्ध दिवस नमनाउने निर्णय गरेको छ ।

प्रकाशित समय ०९:१३ बजे