तामझामका साथमा श्रमिकका लागि योगदानमा आधारित समाजिक सुरक्षा योजना घोषणा गरिएपनि रोजगारदाता कम्पनीले दर्ता गर्न आलटाल गरेका छन् । श्रमिकहरुमा खुसी ल्याएको समाजिक सुरक्षा योजना कार्यक्रममा दर्ता गर्नेपर्ने समयसीमाभित्र रोजगारदाता कम्पनी नगएका हुन् । सरकारले सामाजिक सुरक्षा कोषमा आवद्ध हुन रोजगारदाता कम्पनी तथा व्यवसायिक संस्थाहरुलाई समयसीमा तोकेको थियो ।

काठमाडौं उपत्यकाका ३ जिल्लाभित्रका रोजगारदाताहरु मंसिर ६ देखि फागुन ६ गतेभित्र कोषमा दर्ता हुनुपर्ने समयसीमा तोकिएपनि १ हजार ६ सय कम्पनी मात्र दर्ता भएका हुन् । यो भने कुल कम्पनी सख्याको करिव १५ प्रतिशत मात्र हो ।

काठमाडौं उपत्यकाभित्रका ३ जिल्लाका रोजगारदाताहरुलाई कोषमा दर्ता हुन आउन सरकारले दिएको समयसीमा सकिएपनि दर्ता गराउन पाउनेछन् । यद्यपि सुरक्षा कोषमा दर्ता नै नभए पनि बुझ्न आउने क्रम जारी रहेकाले केही समय थपिएको कोषका कार्यकारी निर्देशक श्यामराज अधिकारीले बताए ।

उनले न्यूज कारोबारसँग भने, ‘कतिपयलाई अझै यस बारेमा जानकारी नभएकोले बझ्न आईरहेका छन्, दर्ताको लागी समय थपेका छौँ, क्रमिक रुपमा सबै रोजगारदाताहरु आउछन् भन्ने लागेको छ ।’उपत्यकाबाहेक प्रदेश ३ का रोजगारदाताले कोषमा अवद्ध हुन मंसिर १५ देखि फागुन १५ भित्रको समयसीमा दिइएको छ ।

त्यसैगरी प्रदेश १ का रोजगारदाताले पुस १ देखि चैत १ सम्मको समयसीमा पाएका छन् । प्रदेश २ का रोजगारदाताले पुस १५ देखि चैत १५ सम्म र गण्डकी एवं प्रदेश ५ का रोजगारदाताले माघ १ देखि बैशाख १ गतेसम्मको समयसीमा पाएका छन् । सुदूरपश्चिम र कर्णाली प्रदेशका रोजगारदाताले माघ १५ देखि वैशाख १५ भित्र सामाजिक सुरक्षा कोषमा निवेदन दर्ता गराउनुपर्ने गरी समयसीमा तोकिएको थियो ।

प्रकाशित समय १६:५२ बजे