उत्तर कोरियाका सर्वोच्च नेता किम जोङ उन अमेरिकी राष्ट्रपति ड्रोनाल्ड ट्रम्पसँगको दोस्रो वार्ताका लागि भियतनाम प्रस्थान गरेका छन् ।

शिखर सम्मेलनका लागि किम रेल चढेर भियतनाम प्रस्थान गरेका हुन् । ट्रम्प र किमबीच आगामी बुधबार र बिहीवार भियतनामको राजधानी हनोईमा भेटवार्ता हुँदैछ । किमलाई भियतनाम पुग्न कम्तीमा दुई दिनभन्दा बढी लाग्ने अन्तर्राष्ट्रिय सञ्चारमाध्यमहरुले जनाएका छन् ।

शनिबार हरियो रङको रेल चढेर किम जोङ उन भियतनाम प्रस्थान गरेको तस्बिर अन्तर्राष्ट्रिय माध्यममा छाएको छ । किम चीन हुँदै भियतनाम जाँदैछन् । किमसँगै उनकी बहिनी किम यो जोङ, उनका विश्वास पात्र पूर्वजनरल किम योङ चोल रहेका छन् ।

गतवर्ष सिंगापुरमा भएको भेटवार्तामा उत्तर कोरियाले आफ्ना पारमाणविक कार्यक्रम रोकेर निशस्त्रिकरणतर्फ अघि बढ्ने प्रतिवद्धता जनाएको थियो । वार्ता निशस्त्रिकरणमा भएका प्रगति र कोरियामाथि लगाइएको नाकाबन्दी फुकुवाका विषयमा केन्द्रित रहने अन्तर्राष्ट्रिय सञ्चारमाध्यमहरूले जनाएका छन् ।

प्रकाशित समय १३:३९ बजे