भारतमा विषाक्त मदिराका कारण मृत्यु हुने मजदुरको संख्या १३३ पुगेको छ । भारतको आसाम राज्यमा विषाक्त मदिरा पिउने दुई सयभन्दा बढी व्यक्तिलाई उपचारका लागि अस्पताल भर्ना गरिएको छ ।

मृत्यु भएका र बिरामी भएका सबै आसामको चिया बगानमा काम गर्ने मजदुर हुन् । स्थानीय सञ्चारमाध्यममा प्रकाशित विवरणहरूका अनुसार अस्पताल भर्ना भएका अधिकांश खतरामुक्त छैनन् ।

दुई साताअघि अरू दुई राज्य उत्तर प्रदेश र उत्तराखण्डमा पनि विषाक्त मदिराका कारण झण्डै सय जनाको मृत्यु भएको थियो । घटनामा दोषी भएको आशंकामा प्रहरीले १० जनालाई गिरफ्तार गरेको छ । मदिरा बिक्री–वितरण रोक्न नसकेको भन्दै दुईजना अधिकारीलाई पनि निलम्बन गरिएको समाचारमा उल्लेख छ ।

प्रकाशित समय ०७:४२ बजे