अनशनरत प्रा.डा. गोविन्द केसीको समर्थनमा चिकित्सकहरु सडकमा उत्रँदा स्वास्थ्य सेवा प्रभावित बनेको छ । प्रदर्शनमा उत्रेका केसी समर्थक चिकित्सकहरुले सडकमै बहिरंग सेवा (ओपिडी) सुरु गरेका छन् ।

डा. केसीको जीवनरक्षाको माग गर्दै त्रिभुवन विश्वविद्यालय, शिक्षण अस्पताल काठमाडौंका आवासीय डाक्टरले शुक्रबार माईतिघर मण्डलामै ओपिडी सेवा संञ्चालन गरेका हुन् । आवासीय डाक्टरको संस्था रेजिडेण्ट डक्टर्स एसोसिएसनको आह्वानमा आकस्मिक बाहेकका सेवा बन्दै गर्दै हड्तालमा उत्रिएका उनिहरुले माईतिघर मण्डलामा सांकेतिक विरोध स्वरुप ओपिडी सेवा सुरु गरेका हुन् ।

स्वास्थ्य सेवा सुधारको माग गर्दै डा. केसी अनशनमा बसेको १४ औं दिन भइसक्दा पनि उनको माग सम्बोधन गर्न सरकारले चासो नदेखाएको भन्दै डाक्टरहरु प्रदर्शनमा उत्रिएका हुन् । डा. केसीको माग सम्बोधन गर्न सरकारले चासो नदेखाएकाले बाध्य भएर सडकमा उत्रनुपरेको एसोसिएसनका अध्यक्ष सुमित पाण्डेले बताए ।

कर्णाली स्वास्थ्य विज्ञान प्रतिष्ठानमा आमरण अनशनमा बसेका डाक्टर केशीको स्वास्थ्य अवस्था कमजोर हुँदै गए पनि सरकार गम्भीर नबनेकाले दबाब दिन सेवा बहिष्कार गरिएको उनले बताए । श्रेष्ठले भने ‘डा केसीको माग पुरा गर्दै उहाँको जीवन रक्षको माग गर्दै, सडकमै ओपीडी राखेर सांकेतिक रुपमा उपचार दिएका हौं ।’

यसअघि आवासीय डाक्टरले कालोपट्टी बाँधेर विरोधका कार्यक्रम गर्दै आएका थिए । शिक्षण अस्पतालमा अहिले झण्डै तीनसय जना आवासीय डाक्टर छन् । डाक्टर केसीको यसअघिका अनशनमा पनि शिक्षण अस्पतालका आवासीय डाक्टरले आकस्मिक बाहेकका सेवा दिएका थिएनन् । डा. केसी चिकित्सा शिक्षा सुधारको माग गर्दै अनशनमा बसेको यो १५ औं पटक हो ।

उता अत्यावश्यक क्षेत्रमा हड्ताल गरेको भन्दै आवासीय डाक्टरको यो निर्णयको चौतर्फी विरोध पनि भएको छ । उपचारलगायत अत्यावश्यक क्षेत्रमा सेवा नै बन्द हुनेगरि हड्ताल गर्न नपाइने सर्वोच्च अदालतको आदेशको उल्लंघन भएको भन्दै विरोध भएको छ । डाक्टरहरुको यो आन्दोलनले उपचारका लागि पुग्ने हजारौं नागरिकलाई मर्का परेको छ ।

(तस्बिर : सुनिल प्रधान)

प्रकाशित समय १५:१८ बजे