नन्द–भाउजू ताल, सिमसार क्षेत्र, ऐतिहासिक बाउन्नकोटी मन्दिर रहेको रुपन्देहीको बाउन्नकोटी सामुदायिक वनलाई पर्यटकीय गन्तव्यको रुपमा विकास गर्न गुरुयोजना बनेको छ ।

अनुमानित ७५ करोड रुपैयाँ खर्चेर ५० बर्षे गुरुयोजना थालिएको हो । महालक्ष्मी इन्जिनियरिङ कन्सल्टेन्सीको समन्वयमा इन्जिनियर जिवन कुमार वन सहित सुदिप ढकाल र निशा वनले तयार गरेको नक्सांकनमाथि आइतबार छलफल भएको छ ।
हालको संरचनालाइ प्राकृतिक स्वरुपमा राख्दै डुंगा सयर, ताल र सिमसार क्षेत्रको सौन्दर्यकरण, बाल उद्यानको थप व्यवस्थित विकास, पिकनिक स्पोर्ट, भ्यू टावर निर्माण गरिने छ ।

यस्तै कलात्मक आकर्षण गेट निर्माण, साइकिलिङ ट्र्याक निर्माण, फुटबल मैदान र कर्भडहलको निर्माण गरिनेछ । यस्तै साँस्कृतिक कार्यक्रमका लागि आवश्यक भौतिक संरचना निर्माण गर्ने पनि गुरुयोजनामा उल्लेख छ । छेउछाउका बस्तीलाई ग्रिन भिलेजको रुपमा परिणत गरी होमेस्टे सञ्चालन लगायतका अवधारणा पनि ल्याइएका छन् ।

एक सय ५४ हेक्टर क्षेत्रफलमा फैलिएको वनमा हाल तीन सय ८० जना सदस्य छन् भने साविक चिल्हिया, मधवलिया, टिकुलीगढ, पडषरी गाविसका चार हजार भन्दा बढी स्थानीयले लाभ लिएका छन् ।

प्रकाशित समय ०७:१८ बजे