तिहार बिदापछिको पहिलो दिन सेयर बजार परिसूचक नेप्से २३ अंकले बढ्दा ‘क’ वर्गका कम्पनी भने लगानीकर्ताको रोजाइमा परेनन् । नेप्से १.३६ प्रतिशतले बढ्दा लगातार तीन वर्षदेखि नाफामा रहेका, सेयरको किताबी मूल्य चुक्ता मूल्यभन्दा कम नभएका र आर्थिक वर्ष समाप्त भएको ६ महिनाभित्र वित्तीय विवरण बुझाउने कम्पनीहरू सूचीकृत हुने ‘क’ वर्गका कम्पनीहरूको कारोबार मापन गर्ने सेन्सेटिभ इन्डेक्स भने राताम्य बनेको हो ।

बुधबार बैंक, विकास बैंक र जलविद्युत समूह घटेका छन् । सबैभन्दा धेरै व्यापार समूह ९.९८ प्रतिशतले बढेको छ । त्यस्तै उत्पादनमूलक समूह ६.९४, जीवन बिमा, ५.१, निर्जीवन बिमा ४.५१, अन्य २.३४ र होटल २.०९ प्रतिशतले बढेका छन् । बाँकी समूहको वृद्धि सामान्य छ ।

कारोबार रकम पनि उल्लेख्य बढेको छ । बुधबार १९४ कम्पनीको १ करोड १६ लाख ७४ हजार ८७५ कित्ता सेयर ४ अर्ब ७९ करोड १० लाख रूपैयाँबराबरमा किनबेच भएको छ । गुराँस फाइनान्स, हिमालयन डिस्टिलरी, बोटलर्स (नेपाल) तराई, विशाल बजार कम्पनी, साल्ट ट्रेडिङ कम्पनी र शिवम् सिमेन्टको सेयर मूल्यमा सकारात्मक सर्किट लागेको छ । सर्वाधिक मूल्यको कारोबार हुनेमा नेपाल रिइन्स्योरेन्स कम्पनी, नेपाल टेलिकम, नेपाल लाइफ इन्स्योरेन्स, शिवम् सिमेन्ट, एनआईसी एसिया, प्रभु बैंकलगायत छन् ।

प्रकाशित समय १५:५५ बजे