सेयर बजार परिसूचक नेप्सेमा मंगलबार १७ अंकको करेक्सन आएको छ । होटल र वित्तबाहेकका सबै समूह घटेपछि नेप्से परिसूचक १७.७९ अंकले घटेर २४२३.०९ अंकमा झरेको हो ।

बजार घट्दा पनि ५९ कम्पनीका लगानीकर्ताले कमाएका छन् । चार कम्पनीको मूल्यमा सकारात्मक सर्किट लागेको छ । गुराँस लघुवित्त, प्रभु लाइफ इन्स्योरेन्स, युनाइटेड फाइनान्स र एभरेस्ट इन्स्योरेन्सको संस्थापक सेयर ९ प्रतिशतभन्दा धेरैले बढेको हो ।

मंगलबार २०७ कम्पनीको १ करोड ९६ लाख ६ हजार ५४५ कित्ता सेयर ८ अर्ब २७ करोड ९६ लाखबराबरमा कारोबार भएको छ । कारोबार रकम सोमबारको भन्दा ६३ करोड कम हो । सोमबार ८ अर्ब ९० करोड ३५ लाख रुपैयाँबराबरको सेयर किनबेच भएको थियो ।

आज नेपाल लाइफ इन्स्योरेन्सको सर्वाधिक १ अर्ब ४५ करोड ७ लाख रूपैयाँको सेयर कारोबार भएको छ । ५० प्रतिशत लाभांश सुरक्षित गर्ने अन्तिम दिन भएकाले नेपाल लाइफको सेयरमा लगानीकर्ताको आकर्षण बढेको हो । कारोबार बन्द हुँदा कुल बजार पुँजीकरण ३२ खर्ब ६३ अर्बमा झरेको छ । सोमबार कुल बजार पुँजीकरण ३२ खर्ब ६६ अर्ब नाघेको थियो ।

प्रकाशित समय १६:२१ बजे