धनगढीका कोरोना संक्रमित युवकका परिवारको सदस्यहरुलाई थ्रोट स्वाबको नमूना संकलन नगरी घर पठाइएको छ । उनीहरुलाई धनगढीस्थित रंगशालामा निर्माण गरिएको क्वारेन्टाइनमा राखिएको थियो ।

दुबईबाट फर्किएर गत ११ गते सेती प्रादेशिक अस्पतालको आइसोलेसन वार्डमा भर्ना भई परीक्षण गर्दा कोरोना पोजिटिभ देखिएका ३४ वर्षीय युवकका परिवारका अन्य सदस्यको नमूना संकलन नगरिएको सेती प्रादेशिक अस्पतालले जनाएको छ । अस्पतालका प्रवक्तासमेत रहेका इमर्जेन्सी विभाग प्रमुख डा. जगदिश प्रसाद जोशीले उनीहरुमा पूर्वलक्षण नदेखिएकाले तत्काल नमूना संकलन नगरिएको जानकारी दिए ।

‘नमूना संकलन गर्न कुनै न कुनै लक्षण देखिनुपर्छ । तर उनीहरुमा त्यस्तो कुनै पनि लक्षण देखिएन । त्यसैले घर पठाइएको हो,’ डा. जोशीको भनाइ छ । परिवारका सदस्यहरुमा कोरोनासँग सम्बन्धित कुनै किसिमको लक्षण नदेखिएकाले अहिले होम क्वारेन्टाइन राखिएको उनले बताए ।

परिवारका सदस्यहरु आठै जना र संक्रमण पुष्टि भएका युवकलाई अस्पतालसम्म लैजाने आफन्तलाई पनि सेल्फ-क्वारेन्टाइनमा बस्न भनिएको छ । उनीहरुलाई ज्वरो आएमा, रुघा खोकी लागेमा मात्र अस्पताल आउने सर्तमा घर पठाइएको हो ।

परीक्षणका लागि स्वाब संकलन नगरी घर पठाएको भन्दै स्थानीयवासीले भने विरोध जनाएका छन् । संक्रमितकी श्रीमती र छोरीको मात्रै थ्रोट स्वाब संकलन गरेर पठाइदिन आग्रह गरे पनि अस्पतालले नमानेको परिवारका सदस्यहरुले बताएका छन् ।

प्रकाशित समय १८:०७ बजे