लकडाउन अर्थात् बन्दाबन्दीका कारण विद्यालय तथा कलेजहरू बन्द भएपछि यतिबेला विद्यार्थीको पढाई अलपत्र भएको छ । यसैबीच कर्णालीका केही विद्यालय तथा कलेजहरुले अनलाइन कक्षा सुरु गरेका छन् । तर अनलाइन कक्षा प्रभावकारी भने हुनसकेका छैनन् ।

बजार क्षेत्रका विद्यार्थी अनलाइन कक्षाको पहुँचमा भए पनि बन्दाबन्दीका कारण गाउँ गएका विद्यार्थीहरू भने समेटिएका छैनन् । निजी तथा आवासीय विद्यालय संगठन (प्याब्सन) कर्णाली प्रदेशका अध्यक्ष नैनसिंह खत्रीले अनलाइन कक्षा प्रभावकारी नभएको बताए । ‘बन्दाबन्दीका कारण अधिकांश विद्यार्थी गाउँ गएका छन्,’ उनले भने, ‘इन्टरनेटकाे पहुँचमा भएका केही विद्यार्थीले मात्र अनलाइन कक्षा लिन पाए । बाँकीलाई समेट्न सम्भव देखिएन ।’

सबै विद्यार्थीसँग इन्टरनेटकाे पहुँच नभएको र विद्युत आपूर्तिसमेत पटक-पटक अवरूद्ध हुने  समस्याले धेरै विद्यार्थी अनलाइन कक्षाको पहुँचबाहिर भएको अध्यक्ष खत्रीको भनाइ छ । उनले भिडियोभन्दा रेडियो र टेलिभिजन प्रभावकारी हुने बताए ।

कर्णालीको राजधानी सुर्खेत उपत्यकाका केही निजी विद्यालयले अनलाइन कक्षा सुरु गरेका छन् । चिल्ड्रेन प्याराडाइज बोर्डिङ स्कुलका शिक्षक हरि चालिसेले सबै विद्यार्थीलाई समेट्न नसके पनि हाल कक्षा ८, ९ र १० का लागि अनलाइन माध्यमबाट पठनपाठन भइरहेको बताए । उनले घर गएका विद्यार्थीलाई मध्यनजर गरी कोर्स भने अगाडि नबढाइएकाे बताए ।

उनले अभिभावकको सल्लाहबमोजिम इन्टरनेटकाे पहुँचमा भएका विद्यार्थीहरुलाई पढ्ने बानिको विकास होस् भनेर कक्षा सञ्चालन गरिएको बताए । त्यस्तै मध्यपश्चिमाञ्चल विश्वविद्यालय अफ साइन्स तथा टेक्नोलोजीका उपप्रध्यापक पन्चदेव भट्टले सबै विद्यार्थी समेट्न नसकिए पनि अनलाइन कक्षा सञ्चालन गरिएको बताए । बन्दाबन्दीका समयमा घर गएका विद्यार्थीलाई सञ्चालन भएको कक्षा रेकर्ड गरेर पछि उपलब्ध गराउने गरी कोर्स अगाडि बढाइकाे उनले जानकारी दिए ।

प्रकाशित समय १६:२३ बजे