लकडाउन खुला भएसँगै काठमाडौं उपत्यकामा कोरोनाभाइरस संक्रमितको संख्या ह्वात्तै बढेको छ । उपत्यकाका तीन जिल्ला काठमाडौं, भक्तपुर र ललितपुरमा मंगलबारसम्म २ सय ६७ जनामा कोरोना संक्रमण देखिएको छ ।

स्वास्थ्य तथा जनसंख्या मन्त्रालयका अनुसार हालसम्म काठमाडौंमा १ सय ७५, ललितपुरमा ४९ र भक्तपुरमा पनि ४३ जना संक्रमित फेला परेका छन् । पछिल्लो २४ घण्टामा उपत्यकाभित्र काठमाडौंमा १४, ललितपु १०र र भक्तपुरमा ४ गरी २८ जनामा संक्रमण पुष्टि भएको छ ।

उपत्यकाको विभिन्न २३ स्थानमा कोरोना संक्रमित फेला परेका छन् । काठमाडौंको चन्द्रागिरि, बूढानीलकण्ठ, धुम्रबाराही, तारकेश्वर, गोल्फुटार, ट्याङ्लाफाँट, धापासी, वसुन्धारा, नैकाप, टेकु, हाँडीगाउँ र कुलेश्वरमा संक्रमित भेटिएको इपिडिमियोलोजी तथा सरूवा रोग नियन्त्रण महाशाखाका निर्देशक डा. वासुदेव पाण्डेले जानकारी दिए ।

यस्तै ललितपुरको धोवीघाट, चापागाउँ, कुपण्डोल, ग्वार्को, खाङबुबहाल, गोटीखेल, भैँसेपाटी, गोदाबरी र ठेचोँ तथा भक्तपुरको बालकोट र गट्ठाघरमा संक्रमण भेटिएको उनले जानकारी दिए ।

पछिल्लो २४ घण्टामा मुलुकभर २०४ संक्रमित थपिएका छन् । हालसम्म कोरोना संक्रमितको संख्या १६ हजार १६८ पुगेको छ । पछिल्लो २४ घण्टामा छ हजार १३३ नमूनाको पीसीआर विधिबाट परीक्षण गरिएको स्वास्थ्य मन्त्रालयले जानकारी दिएको छ । हालसम्म पीसीआर विधिबाट दुई लाख ६१ हजार ८६१ नमूना परीक्षण गरिएको मन्त्रालयले जनाएको छ ।

प्रकाशित समय १८:४६ बजे