सरकारले कोरोना परीक्षणमा दुई हजार रूपैयाँ मात्र लिन गरेको निर्देशन विपरित कलेज अफ मेडिकल साइन्स शिक्षण अस्पताल (पुरानो मेडिकल कलेज)ले भिटिएम शुल्क र यातायात खर्च भन्दै थप एक हजार रूपैयाँ लिएको पाइएको छ ।

कलेजका निर्देशक डा. मनोहर प्रधानले पहिले अतिरिक्त शुल्क लिएको स्वीकार गर्दै हाल भने नलिएको जिकिर गरे । उनका अनुसार यहाँ संकलन गरिएको स्वाब परीक्षणका लागि काठमाडौँको स्टार हस्पिटलमा पठाइँदै आइएको छ । सो अस्पतालले परीक्षण शुल्क दुई हजार ४०० रूपैयाँ लिने हुँदा आफूहरुले यातायात शुल्कसहित तीन हजार रूपैयाँ लिएको स्वीकार गरे ।

हाल भने अस्पतालले ४०० रूपैयाँ थप गरेर परीक्षण गराउँदै आएको उनको दाबी छ । यद्यपि जिल्लाकै दुई सरकारी अस्पताल र एक मेडिकल कलेजमा पीसीआर परीक्षण हुँदै आएको छ । प्रधानले भने यहाँका अस्पतालले ढिलो नतिजा दिने र सिटी भ्यालुको नतिजा नदिएपछि काठमाडौँ स्वाब पठाउने गरेको बताए । जिल्ला प्रशासन कार्यालय चितवनले यहाँको चितवन मेडिकल कलेज र बीपी कोइराला मेमोरियल क्यान्सर अस्पतालले स्वाब परीक्षणमा ५०० रूपैयाँ बढी लिएको भन्दै मुद्दा चलाएको छ ।

कलेजका प्रतिनिधिले १८ लाख रूपैयाँ र क्यान्सर अस्पतालका प्रमुखले आठ लाख रूपैयाँ धरौटी जम्मा गरेर मुद्दा लडिरहेका छन् । प्रमुख जिल्ला अधिकारी नारायणप्रसाद भट्टराईले सो मेडिकल कलेजले अतिरिक्त शुल्क लिएको जानकारी प्राप्त भएको भन्दै कारबाही प्रक्रिया अघि बढाइने जानकारी दिए । (रासस)

प्रकाशित समय १२:५२ बजे