भारतले नेपाल सरकारलाई उपलब्ध गराएको कोरोनाविरूद्धको खोप बिहीबारदेखि काठमाडौं आउन थाल्ने स्वास्थ्य तथा जनसंख्या मन्त्रालयले जानकारी दिएको छ । भारतले नेपाललाई १० लाख डोज कोभिसिल्ड खोप अनुदानस्वरूप उपलब्ध गराउने निर्णय गरेको छ ।

भारतले खोप उपलब्ध गराएको घोषणा गर्न बुधबार आयोजित कार्यक्रममा स्वास्थ्यमन्त्री हृदयेश त्रिपाठीले नेपाललाई खोप उपलब्ध गराएकामा भारतलाई धन्यवाद दिएका छन् । नेपाललाई कोरोना महामारीका बेलामा पनि निरन्तर औषधिलगायत सामग्री प्रदान गरेको सहयोग गरेकामा उनले भारतको सराहना पनि गरे । मन्त्री त्रिपाठीले नेपालका लागि भण्डारण र ढुवानीका लागि यो खोप उपयुक्त रहेको बताए ।

पहिलो चरणमा ३ प्रतिशत सफाइकर्मी, स्वास्थ्यकर्मी र सुरक्षाकर्मीलाई खोप दिइने र यसका लागि कानुनी, प्रशासनिक, आर्थिक सबै तयारी भइसकेको  मन्त्री त्रिपाठीले जानकारी दिए । उनका अनुसार नेपालका ७२ प्रतिशत जनसंख्यालाई खोप लगाउने सरकारको तयारी छ ।

औषधि व्यवस्था विभागले अघिल्लो साता भारतको सिरम इन्स्टिच्युटले उत्पादन गरिरहेको अक्सफोर्ड एष्ट्राजेनेकाको कोभिसिल्ड खोपलाई आपतकालीन प्रयोगका लागि अनुमति दिएको थियो । कोभिसिल्ड बेलायतको अक्सफोर्ड विश्वविद्यालय र एष्ट्रोजन कम्पनीले विकास गरेका हुन् । भारतले नेपालसहित भुटान, माल्दिभ्स, बंगलादेश, म्यानमार र सेसल्सलाई खोप अनुदानमा दिन लागेको हो ।

प्रकाशित समय १४:५७ बजे