चिकित्सा क्षेत्र सुधारका लागि सरकारसँग सम्झौता गरेका वरिष्ठ चिकित्स गोविन्द केसीले संसदीय समितिमा भाग लिन अस्वीकार गरेका छन् । प्रतिनिधिसभाअन्तर्गतको शिक्षा तथा स्वास्थ्य समितिको ‘राष्ट्रिय चिकित्सा शिक्षा विधेयक, २०७५’ माथिको दफावार छलफलमा उपस्थित भएर छलफल गर्न उनले अस्वीकार गरेका हुन् । समितिको राष्ट्रिय चिकित्सा शिक्षा विधेयक, २०७५ माथिको दफावार छलफलमा बुधबार वरिष्ठ चिकित्सक केसीले लिखित धारणा राखे ।

विधेयकका बारेमा आफूले सरकारसँग सम्झौता गरिसकेकाले विधेयकमाथिको छलफलमा भाग नलिएको बताए । लिखित धारणामा उनले भनेका छन्, ‘सरकारले मसँग गरेका सम्झौता बमोजिम संसदबाट यथाशीघ्र सो विधेयक पारित गराउन पहल गरिदिन म समिति समक्ष आग्रह गर्दछु ।’

आफू र सरकारबीच भएको नौं बुदे सहमति अनुसार परिमार्जन गरी विधेयक पारित हुने विश्वास पनि उनले समिति समक्ष व्यक्त गरे । केसीले मेडिकल शिक्षाको नियमन तथा यसबारे कानुन र नीति निर्माणको काम अन्र्तराष्ट्रिय मापदण्ड अनुसार गर्न पनि संघीय सरकार र सांसदहरुलाई आग्रह गरे । ‘नागरिकको स्वास्थ्य सेवामा सहज पहुँच र सबै विद्यार्थीले मेडिकल शिक्षा हासिल गर्न सकून भन्ने उद्देश्यका साथ सत्याग्रह गर्नु परेको हो,’ उनले भनेका छन् ।

बिहीबार बिहान ११ बजे बस्ने समितिको अर्को बैठकमा नेपाल मेडिकल एशोसिएसनसँग छलफल गर्ने कार्यसूची तय गरिएको समितिका जेष्ठ सदस्य मानबहादुर विश्वकर्माले जानकारी दिए ।

प्रकाशित समय १८:२६ बजे