देशभर अधिकांश स्थानमा निषेधाज्ञा जारी रहे पनि कोरोना संक्रमणदर भने उस्तै रहेको छ । हरेक दिन एक हजारको हाराहारीमा नयाँ संक्रमित थपिइरहेका छन् । पछिल्लो २४ घण्टामा देशभर थप १ हजार २ सय २८ जनामा कोरोना भाइरस (कोभिड-१९) को संक्रमण पुष्टि भएको छ । बुधबार ३२० महिला र ८०० पुरुष गरी १ हजार १ सय २० जनामा कोरोना संक्रमण भएको थियो ।

विभिन्न प्रयोगशालामा १३ हजार ४१३ नमुना परीक्षण गर्दा ३९४ महिला र ८३४ पुरुषमा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार गत २४ घण्टाको अवधिमा काठमाडौं उपत्यकामा ४ सय ४५ जनामा कोरोना संक्रमण भएको स्वास्थ्य तथा जनसंख्या मन्त्रालयले जनाएको छ । काठमाडौंमा ३ सय ५७, भक्तपुर ४२ र ललितपुरमा ४६ जनामा कोरोना पुष्टि भएको हो । बुधबार काठमाडौं उपत्यकामा ३ सय ८८ जनामा कोरोना संक्रमण पुष्टि भएको थियो ।

अब देशभर कुल संक्रमितको संख्या ४२ हजार ८ सय ७७ पुगेको मन्त्रालयका प्रवक्ता डा. जागेश्वर गौतमले बिहीबारको नियमित प्रेस ब्रिफिङमा जानकारी दिए । उनका अनुसार बितेको २४ घण्टामा ९ सय १७ जना डिस्चार्ज भएका छन् भने हालसम्म निको हुनेको कुल संख्या २४ हजार २ सय ७ पुगेको छ ।

देशभर सक्रिय संक्रमितको संख्या १८ हजार ४ सय १३ रहेको छ । जसमा संस्थागत आइसोलेशनमा १० हजार ६ सय ७१ र होम आइसोलेशनमा ७ हजार ७ सय ४२ जना रहेका छन् । यस्तै देशभर कोरोनाबाट मृत्यु हुनेको संख्या २५७ पुगेको छ । बितेको २४ घण्टामा ६ जनाको मृत्यु भएको मन्त्रालयले जनाएको छ ।

प्रकाशित समय १६:३२ बजे