नेपालमा कोरोनाभाइरस संक्रमितको संख्या घट्ने क्रममा देखिँदैन । दैनिक एक हजारको हाराहारीमा संक्रमित थपिने क्रम जारी छ । पछिल्लो २४ घन्टाभित्र विभिन्न जिल्लामा १ हजार ४१ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

थपिएका संक्रमितमध्ये ३ सय ४९ महिला  र ६ सय ९२ पुरूष हुन् । मन्त्रालयका अनुसार बितेको २४ घण्टामा १२ हजार ४७३ जनाको पीसीआर भएको थियो । शनिबारको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले देशभर संक्रमितको संख्या ४५ हजार २ सय ७७ पुगेको जानकारी दिए ।

शुक्रबार १३ हजार ६ सय ३८ पीसीआर परीक्षण गर्दा ४ सय ६४ महिला र ८ सय ९५ पुरूष गरी थप १३ सय ५९ जनामा कोरोना भाइरसकाे संक्रमण पुष्टि भएको थियो । शुक्रबार ४ महिलासहित १४ जनाले कोरोनाका कारण ज्यान गुमाएका थिए ।

हाल देशभर सक्रिय संक्रमितको संख्या १७ हजार ८ सय ७० रहेको प्रवक्ता गौतमले जानकारी दिए । संस्थागत आइसोलेशनमा ९ हजार ८ सय ६६ जना रहेका छन् भने होम आइसोलेशनमा ८ हजार ८ जना रहेका छन् ।

यस्तै पछिल्लो २४ घण्टामा डिस्चार्ज हुनेको संख्या १ हजार ५ सय ६६ जना रहेको छ भने कुल निको हुनेको संख्या २७ हजार १२७ पुगेको छ । शुक्रबार १ हजार ३ सय ५४ जना कोरोना संक्रमित डिस्चार्ज भएका थिए ।

गत २४ घण्टाभित्र थप ९ जनाको कोरोना संक्रमणबाट मृत्यु भएको छ । अब नेपालमा मृतकको संख्या २ सय ८० पुगेको मन्त्रालयले जनाएकाे छ ।

प्रकाशित समय १६:३२ बजे