प्रमुख प्रतिपक्षी नेपाली कांग्रेसको अवरोधका कारण आजको संसद बैठक स्थगित भएको छ । सरकारले प्रतिनिधि सभाको आजको बैठकमा चिकित्सा शिक्षा विधेयक पेश गर्ने तयारी गरेको थियो । तर, प्रतिपक्षी नेपाली कांग्रेसका सांसदहरुको अबरोधका कारण बैठक स्थगित हुन पुगेको हो ।

सरकारले आज पेश गर्न लागेको चिकित्सा शिक्षा विधेयकले चिकित्सा शिक्षा अध्यादेशलाई प्रतिश्थापन गर्नेछ । उक्त अध्यादेश असार २० बाट निस्क्रिय हुँदैछ । त्यसैले उक्त अध्यादेशलाई प्रतिश्थापन गर्ने विधेयक फास्ट ट्रयाकबाट पारित गराउने सरकारको तयारी थियो । तर, प्रतिपक्षीको अबरोधका कारण सरकारको सो तयारी आज पूरा हुन सकेन ।

प्रतिपक्षीको अबरोधपछि सभामुख कृष्णबहादुर महराले आधा घण्टाको लागि बैठक स्थगित गरेका थिए । तर, त्यसपछि सत्ता पक्ष र प्रतिपक्षका सांसदहरुसँग सभामुख महराले गरेको सहमति प्रयास फलदायी हुन नसकेपछि सूचना टाँस गरी भोलीसम्मका लागि बैठक स्थगित गरिएको हो ।

अबरोधका कारण आजै तीन बैठक बसी विधेयक फास्ट ट्रयाकबाट पारित गराउने सरकारी तयारी पुरा हुन सकेन । सभामुखसँगको छलफलका क्रममा सत्तापक्षका सांसदले विधेयक पारित गर्न समय अभाव हुने भएकाले फास्ट ट्रयाकबाट जानुपर्ने बताएका थिए भने प्रतिपक्षीका सांसदहरुले अध्यादेशको मूल मर्म परिवर्तन गरिएको र विधेयक पढ्न समेत नपाईएको भन्दै अबरोध जारी राख्ने बताएका थिए ।

प्रकाशित समय १४:३३ बजे