भारतको नयाँ दिल्ली प्रदेशले कोरोना भाइरसविरुद्ध काम गरिरहेका बेला मृत्यु भएमा प्रहरीको परिवारलाई एक करोड रुपैयाँ क्षतिपूर्ति दिने घोषणा गरेको छ । केन्द्रीय राजधानीसमेत रहेको प्रदेश सरकारले कोरोनाविरुद्धको लडार्इंका क्रममा निधन भएका अमितको परिवारलाई एक करोड क्षतिपूर्ति दिने घोषणा गरेको हो ।

नयाँ दिल्लीका मुख्यमन्त्री अरविन्द केजरीवालले हिन्दी भाषामा सामाजिक सञ्जाल ट्विटरमा लेख्दै अमितले आफ्नो जीवनको समेत प्रवाह नगरी निरन्तर कोरोनाविरुद्धको लडाईंमा सक्रिय भएको उल्लेख गरेका छन् । उनले लेखेका छन्, ‘कामको सिलसिलामा उहाँलाई कोरोनाभाइरसको संक्रमण भयो र दुर्भाग्यबस उहाँले हामीलाई छाडेर जानुभयो । उहाँको योगदानलाई म सलाम गर्दछु र आत्माको चिरशान्तिको कामना गर्दछु ।’

मुख्यमन्त्री केजरीवालले उनको योगदान र लगावको उच्च मूल्यांकन गर्दै परिवारलाई एक करोड क्षतिपूर्ति प्रदान गर्ने कुरा पनि ट्विटरमै लेखेका छन् । (रासस)

प्रकाशित समय २०:५१ बजे