विश्व स्वास्थ्य संगठन (डब्लूएचओ) का प्रमुख टेड्रोस अधानोम गेब्रेयोसुसले महामारीलाई राजनीतीकरण नगर्न विश्व शक्ति राष्ट्रहरूलाई आग्रह गरेका छन् । ‘विश्व नेताहरुले कोरोनाभाइरससँगै उत्पन्न महामारीलाई राजनीतीकरण गर्न पाउनुहुन्न, बरु एकताबद्ध भएर लड्नुपर्छ,’ डब्लूएचओ प्रमुख टेड्रोस अधानोम गेब्रेयोसुसले भने ।

अझै पनि कोरोनाभाइरसको संक्रमण उत्तिकै फैलिइरहेको र यसले गर्ने क्षतिमा कमी नभएको उनले बताए । संक्रमितहरुको संख्या दिनप्रतिदिन बढ्दै गइरहेको प्रति अपेक्षित संवेदनशीलता विश्व नेताहरुमा नदेखिएको भन्दै उनले चिन्ता व्यक्त गरे ।

अमेरिकी राष्ट्रपति डोनाल्ड ट्रम्पले विश्वभर कोरोनाभाइरसको महामारी सुरु भएदेखि नै डब्लूएचओले प्रभावकारी भूमिका खेल्न नसकेको र चीनसँग नजिक भएको भन्दै आलोचना गर्दै आएका छन् । डब्लूएचओका प्रमुख गेब्रेयोसुसको भनाइ पनि ट्रम्प लक्षित नै थियो ।

गेब्रेयेसुसले ब्राजिल, इराक, भारत, दक्षिणी तथा पश्चिमी अमेरिकी देशहरुको अवस्थाप्रति पनि चिन्ता व्यक्त गरे । ती देशहरुमा अझै पनि धेरै कोरोनाभाइरसबाट संक्रमित रहेको र अस्पतालहरुमा बिरामीहरुको चाप रहेको भन्दै सतर्क रहन उनले आग्रह गरे ।

प्रकाशित समय ०७:४७ बजे