दक्षिण कोरियाली पूर्वराष्ट्रपति पार्क गुएन हेलाई थप आठ वर्ष जेल सजाय सुनाइएको छ । सोलस्थित एक अदालतले शुक्रबार हेलाई यसअघि दिइएको सजायमा आठ वर्ष थपेको हो ।

हेले गरेको भनिएको भ्रष्टाचारको अनुसन्धानका क्रममा यो सजाय थपिएको हो । यसअघि नै उनलाई २४ वर्षको जेल सजाय भएको थियो । हेमाथि लागेको भ्रष्टाचारसम्बन्धी मुद्दामा गत महिना २४ वर्ष जेल र एक करोड ७० लाख अमेरिकी डरल बराबरको जरीवनाको सजाय सुनाइएको थियो ।

दक्षिण कोरियाको राजधानी सोलस्थित एक अदालतका अनुसार उनले अब ३२ वर्ष जेल सजाय व्यहोर्नुपर्ने भएको छ । सन् २०१७ को मार्च महिनामा भ्रष्टाचारको आरोपमा उनलाई नियन्त्रणमा लिइएको थियो । त्यसयता उनी थुनामा रहँदै आएकी छिन् । उनले गरेको भ्रष्टाचारको प्रकृतिअनुसार कम्तीमा ३० वर्षको जेल सजायको माग यसअघि नै सरकारी वकिलले गरेका थिए ।

पार्क ६६ वर्षकी छिन् । हे दक्षिण कोरियाकी पहिलो महिला राष्ट्रपति भएकी थिइन् । उनीमाथि राष्ट्रपति पदमा रहँदा शक्तिको दुरुपयोग गरेको आरोप लागेको हो । भ्रष्टाचारको संलग्नता प्रारम्भिक अदालतले प्रमाणित गरेपछि उनलाई संसदमा महाअभियोग लगाएर बर्खास्त गरिएको थियो ।

दक्षिण कोरियाको पहिलो महिला राष्ट्रपति हे महाअभियोग लगाएर निकालिएकी पनि दक्षिण कोरियाका लागि पहिलो राष्ट्रपति हुन् ।

(रासस/एएफपी)

प्रकाशित समय १८:०८ बजे