जापानको होक्काइदो द्वीपमा बिहीबार गएको ६.६ म्याग्निच्युडको शक्तिशाली भूकम्पमा परी ज्यान जानेको संख्या १८ पुगेको छ । शुक्रबार जापानबाट प्राप्त समाचारमा भूकम्पबाट भवन भत्किएर र भूस्खलनमा परी १८ जनाको ज्यान गएको र करिब २२ जना स्थानीय बेपत्ता भएको जनाइएको छ ।

गत साता होक्काइदो वरपर शक्तिशाली आँधी पनि आएको थियो । त्यस आँधीले पनि जनधनको ठूलो क्षति भएको थियो । अधिकारीहरू उद्धार कार्यमा खटिरहेका समाचारमा जनाइएको छ । क्षतिको पूर्ण विवरण आइसकेको छैन । सरकारी निकायले सुनामीको भने डर नरहेको बताएको छ ।

होक्काइदोका अधिकांश भूभागमा विद्युत सेवा अवरूद्ध छ भने रेलसेवा चलेको छैन । आँधीले विच्छेद गराएको विद्युत् सेवा पुनः सुरु भएपछि भूकम्प गएको अधिकरीहरूले बताएका छन् ।

भूकम्पबाट दर्जनौं घर ध्वस्त भएका र अरू धेरै घरमा आंशिक क्षति पुगेको छ । भूकम्प प्रभावित इलाकाका बासिन्दालाई राहत उपलब्ध गराइएको छ । बढी प्रभावित केही व्यक्तिलाई हेलिकप्टरबाट समेत उद्धार गरिएको छ ।

भूकम्पबाट कम्तीमा १६ लाख नागरिक प्रभावित भएका थिए । शुक्रबारसम्ममा यो संख्या आधा जति घटेको र ती नागरिकलाई विद्युत् र खानेपानी उपलब्ध गराइएको प्रहरी अधिकारीले जनाएका छन् ।

होक्काइदो द्वीपमा उद्वारका लागि करिब २० हजार उद्धारकर्ता परिचालित भएको सरकारका प्रवक्ता योसिहिदे सुगाले बताएका छन् । उद्धार कार्यमा हजारौं सैनिक पनि परिचालन गरिएको छ ।

जापानमा सन् २०११ को मार्च ११ मा आएको विनाशकारी ९ रेक्टर स्केलको भूकम्पपछिको सुनामीमा परी निकै ठूलो जनधनको ठूलो क्षति भएको थियो । सो सुनामीबाट करिब १९ हजार नागरिकको ज्यान गएको थियो ।

प्रकाशित समय १७:३० बजे