विभिन्न परिस्थितीका कारण घरबारविहीन भएका नगरबासीलाई रुपन्देहीस्थित सैनामैना नगरपालिका आफैले घर निर्माण गर्ने योजना अघि बढाएको छ । संघीय सरकारको तराई समृद्धि कार्यक्रम अन्तर्गत पेश गरिएको नमुना बस्ती प्रस्ताव स्वीकृत भएपछि नगरपालिकाले यस्तो योजना अघि बढाएको हो ।

सैनामैना नगरपाभित्र घरवारविहिनको संख्या पहिचान गरी उनीहरुलाई उक्त नमुना घर हस्तान्तरण गरिनेछ । विभिन्न परिस्थीती, प्रकोप तथा घटनाबाट आफ्नो जग्गा पनि नभएका, घर पनि नभएका व्याक्तिहरुलाई समृद्धिको रुपमा उक्त घर निर्माण गर्न लागिएको नगर प्रमुख चित्र बहादुर कार्कीले जानकारी दिए ।

यस्तै नगरपालिकाले अहिले निर्माण गर्दै गरेको चक्रपथबाट समेत  विस्तापित भएका केही घरवारविहिनहरुलाई पनि उक्त नमुना बस्तीमा राखिने योजना रहेको नगर प्रमुख कार्कीले जानकारी दिए । सैनामैना नगरपालिका-११ को बरौली भाटा गाउँमा नदी उकास क्षेत्रलाई नमुना बस्तीको रुपमा विकास गर्ने नगरपालिकाको योजनालाई संघीय सरकारले समेत साथ दिएको छ ।

कुल लागत १ करोड १० लाखमा पहिलो चरणमा ५ वटा नमुना घर निर्माण हुनेछन् । त्यस्तै दोस्रो चरणमा घर निर्माणको क्रमलाई निरन्तरता दिने नगरप्रमुख चित्र बहादुर कार्कीले जानकारी दिए । ‘असार सम्ममा ५ वटा नमुना घर निर्माण गर्ने योजना छ,’ नगरप्रमुख कार्कीले भने, ‘नदी उकास जग्गालाई  उपयोग गरी उक्त कार्य गर्न लागेका हौं ।’

संघीय सरकारमा नगरपालिकाले लगेको प्रस्ताव स्वीकृत भएको र अब केही समयमा नै उक्त निर्माणको कार्य अगाडि बढाउने नगर प्रमुख कार्कीले बताए । भुकम्प प्रतिरोधी, सुरक्षित आवासको रुपमा बेघरबार, जमिन पनि नभएका व्याक्तिहरुलाई मापदण्ड बनाएर प्रदान गरिने नगरपालिकाका प्रमुख प्रशासकीय अधिकृत कृष्ण प्रसाद भण्डारीले जानकारी दिए ।

सैनामैना नगरपालिका-११ को बरौलीभाटामा रहेको करिब ५ बिघा जग्गामा नमुना बस्ती बन्नेछ । उक्त नमुना बस्तीको लागि जग्गा छनौट कार्य सकीएको छ भने नक्सा डिजाइनको कार्य समेत अगाडि बढेको छ । गरपालिकाले कुल लागतको १० प्रतिशत व्यहोर्ने छ भने अन्य ९० प्रतिशत संघीय मन्त्रालयले व्यहोर्ने छ ।

पहिलो चरणमा नमुना बस्तीको रुपमा निर्माण गरिने र यसलाई विस्तार गरिने छ । कोही पनि नागरिक आवासको अभावमा जीवन बाँच्न नपरोस भन्ने उद्देश्यले नमुना बस्ती निर्माण गर्न लागिएको नगरपालिकाले जनाएको छ । प्रस्ताव गरिएको जग्गाको केही समय पहिला स्थानीय, जनप्रतिनिधि, सरोकारवाला निकाय, प्राविधिक टोलीले निरीक्षण समेत गरेको थियो ।

प्रकाशित समय १२:११ बजे