गृहपृष्ठ फाइल होइन जनताले कामको परिणाम बुझ्छन् : मन्त्री पण्डित

फाइल होइन जनताले कामको परिणाम बुझ्छन् : मन्त्री पण्डित

lalbabu-pandit (1) फाइल तस्बिर

 

संघीय मामिला तथा सामान्य प्रशासनमन्त्री लालबाबु पण्डितले जनताले अनुभूति हुने किसिमले परिमाण आउने गरी कर्मचारीले काम गर्नुपर्ने बताएका छन् । आर्थिक वर्ष २०७४/०७५ को वार्षिक प्रगति समीक्षा एवं मन्त्रालयस्तरीय विकास समस्या समाधान समितिको बैठकलाई बुधबार संबोधन गर्दै मन्त्री पण्डितले यस्तो बताएका हुन् ।

मन्त्रालयमा आयोजित कार्यक्रममा उनले भने, ‘जनताले बुझ्ने भनेको कामको परिमाण हो । दराज कहाँ छ, फाइल कहाँ पुग्यो भन्ने होइन, जुन लक्ष्य हो त्यसको परिमाण ल्याउने गरी दिन दुई गुणा र रात चार गुणाजस्तो परिमाण निकाल्ने गरी काम गर्नुपर्छ ।’

कार्यक्रममा मन्त्रालयका निमित्त सचिव सुरेश अधिकारीले गत निर्वाचन र संघीयता कार्यान्वयनको कारण विकास निर्माणमा अलमल भएको बताउँदै यसै वर्ष कर्मचारी समायोजनको काम सकिने जानकारी दिए ।

राष्ट्रिय योजना आयोगका सहसचिव नरेश चापागाईले अनुगमन नहुँदा योजना कार्यन्वयन गर्ने काम कमजोर रहेको बताए । प्रधानमन्त्री तथा मन्त्रिपरिषद् कार्यालयका उपसचिव खोमा ढकालले सरकारले शुरु गरेको समृद्ध नेपाल र सुखी नेपाली अभियानलाई सहयोग पुग्ने किसिमले काम गर्नुपर्नेमा जोड दिइन् । त्यसै गरी अर्थ मन्त्रालयका उपसचिव चन्द्रकुमार श्रेष्ठले बेरुजु फछ्र्योट सुधार गर्नुपर्नेमा जोड दिए ।

मन्त्रालयले गत आ.व.मा चालूतर्फ ८८.५८ प्रतिशत र पूँजीगततर्फ ५३.०४ प्रतिशत गरी कूल ७५.०४ प्रतिशत बजेट खर्च गरेको जानकारी मन्त्रालयका सहसचिव पुरुषोत्तम नेपालल दिए । यस्तै मन्त्रालयले ४१.२१ प्रतिशत बेरुजु फछ्र्योट र भौतिकतर्फ ८० प्रतिशत काम सम्पन्न गरेको छ ।

रासस

प्रकाशित समय १७:०६ बजे

प्रतिक्रिया दिनुहोस्

सम्बन्धित शीर्षकहरु