पूर्वपदाधिकारीको नाममा राज्यबाट सुरक्षा लिनेमा पूर्वप्रधानमन्त्री एवं नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ अगाडि छन् । ‘सुरक्षा थ्रेट’का नाममा राज्यले पूर्वपदाधिकारीलाई सुरक्षा उपलब्ध गराउँदै आएकोमा प्रचण्डले बढी सुरक्षा सेवा लिइरहेका छन् । यति हुँदाहुँदै पनि उनले आफूलाई नेत्रविक्रम चन्द ‘विप्लव’ नेतृत्वको समूहले हत्या गर्न खोजेको बताएपछि उनीमाथिको सुरक्षा थ्रेटबारे सरकार गम्भीर देखिएको छ । सुरक्षा निकायले प्रचण्डलाई सुरक्षा थ्रेट बढेकै निष्कर्ष निकालेका छन् ।

सुरक्षा विज्ञका अनुसार सशस्त्र संघर्षको नेतृत्व गरेर आएका प्रचण्ड र पूर्वमाओवादीका नेताहरुलाई शान्ति प्रक्रियामा आएपछि सुरक्षा थ्रेट हुनु अस्वाभाविक होइन । सरकारले पनि त्यही सुरक्षा थ्रेट मूल्यांकन गरेर अरु भिभिआईपीभन्दा बढी सुरक्षा तथा अरु सुविधा उपलब्ध गराउँदै आएको छ । तर, समयानुकूल सुरक्षा थ्रेट मूल्यांकन गरेर सुरक्षाकर्मी थपघट हुनुपर्नेमा भएको छैन ।

पूर्वप्रधानमन्त्री प्रचण्डलाई सरकारले बा. १ झ १४७९ को जिपसमेत उपलब्ध गराएको छ । वि.सं. २०६६ साल साउन ९ गतेको मन्त्रिपरिषद बैठकले प्रचण्डलाई ०६६ जेठबाट लागू हुने गरी आवास सुविधाबापतको घरभाडा, धारा, बिजुलीको बिललगायतको सुविधा उपलब्ध गराउँदै आएको छ । यससँगै सुरक्षाका लागि सशस्त्र प्रहरीको टोली खटाएको छ ।

सुरक्षा थ्रेटबारे प्रचण्ड आफैंले पटकपटक बोलेपछि यसबारे गृह मन्त्रालयले थप सुविधा दिने तयारी गरेको हो । राष्ट्रिय अनुसन्धान विभाग र अरु सुरक्षा निकायको सूक्ष्म अनुसन्धानबाट प्रचण्डलाई सुरक्षा थ्रेट बढेको निष्कर्ष आएकाले पहिलेको सेवा सुविधामा हेरफेर गर्न लागिएको गृह मन्त्रालयका एक उच्च अधिकारीले बताए । प्रचण्डले आफूलाई सुरक्षा थ्रेट भएको अभिव्यक्ति दिएलगत्तै सरकारले सार्वजनिक जीवनमा रहेका सबै व्यक्तिउपरको सम्भावित सुरक्षा खतरा विश्लेषण गरी आवश्यक सुरक्षा व्यवस्था गर्न सुरक्षा निकायलाई निर्देशनसमेत दिएको छ ।

गृह मन्त्रालय स्रोतले भन्यो– विगतमा सँगै युद्ध लडेका तर चरम असन्तुष्ट बनेका समूहबाट नै सुरक्षा थ्रेट रहेको निष्कर्ष छ, यसैले अहिले पाइरहेको सुरक्षा सुविधामा केही बढाउने तयारी छ । साथै उहाँ सरिक हुने विभिन्न स्थल तथा कार्यक्रममा सुरक्षा निगरानी बढाइनेछ ।

विगतमा माओवादी पार्टीप्रति असन्तुष्ट समूह र त्यो समूहलाई परिचालन गर्ने जुनसुकै पक्षबाट प्रचण्डलाई बढी थ्रेट रहेको गृह मन्त्रालय स्रोतले जनाएको छ । सुरक्षा निकायको पछिल्लो विश्लेषणपछि गृह मन्त्रालयले सबै सुरक्षा निकायलाई प्रचण्डमात्र नभई विशिष्ट व्यक्तिहरूको सुरक्षाका लागि विशेष ध्यान दिनसमेत निर्देशन दिइसकेको छ ।

प्रचण्डले कति सुरक्षा लिएका छन् ?
प्रचण्डको सुरक्षामा नेपाल प्रहरीका एक डिएसपीको नेतृत्वमा २९ र डिएसपीकै नेतृत्वमा ३० जना गरी ५९ जना सुरक्षाकर्मी खटाइएको छ । यो अरु पूर्वप्रधानमन्त्रीको तुलनामा निकै बढी हो । द्वन्द्वबाट आएका शक्तिलाई आफ्नै भित्रबाट पनि सुरक्षा थ्रेट हुन सक्ने र बाहिर पनि उत्तिकै थ्रेट रहने सुरक्षा विज्ञहरु बताउँछन् ।

तत्कालीन एमाओवादीबाट फुटेर मोहन वैद्य नेतृत्वको नेकपा–माओवादी र सो पार्टीबाट पनि फुटेर नेत्रविक्रम चन्दको नेतृत्वमा माओवादी गठन भएको छ । माओवादी र नेकपा एमाले एकता भएपछि अन्य स–साना समूह पनि गठन भएका छन् । ती असन्तुष्ट पक्ष जति धेरै भए उति धेरै सुरक्षा खतरा रहने सुरक्षा मामिलाका जानकारहरु बताउँछन् ।

प्रचण्डले आफूलाई सुरक्षा थ्रेट भएको बताएलगत्तै अरु पूर्वपदाधिकारीलाई पनि त्यस्तो खतरा भए सरकारलाई जानकारी गराउन गृह मन्त्रालयले आग्रह गरेको छ । गृह मन्त्रालयले विपक्षी दलका नेता एवं पूर्वप्रधानमन्त्रीको सुरक्षामा सरकार चनाखो भएको जनाउँदै सुरक्षा खतराको कुन जानकारी भए उपलब्ध गराउन आग्रह गरेको छ ।

प्रकाशित समय २१:२१ बजे